Serbia është në heshtje zgjedhore përpara votimeve parlametare dhe lokale që mbahen këtë të fundjavë.
Votuesit serbë do tju drejtohen kutive të votimit të dielën për të zgjedhur qeverinë e re të vendit dhe kryetarët e 65 bashkive, përfshirë kryqytetin.
Mbajtja e zgjedhjeve parlamentare u nxit nga protestat e qytetareve të zemëruar me reagimin e qeverisë ndaj dy sulmeve të njëpasnjëshme të armatosura, njëri prej tyre në një nga shkollat e kryeqytetit ku mbeten te vdekur 19 nxënës më herët gjatë këtij viti.
Presidenti Vuçiç, ish ministër i Sllobodan Millosheviçit, i veshur me petkun e reformuesit, synon të konsolidojë edhe më tej kontrollin e tij mbi shtetin serb.
Gjatë fushatës, Vucic i ka konsideruar si shumë të rëndësishme këto zgjedhje dhe katër vitet e ardhshme të shtetit serb.
Përballë Vuçiç, është një opozitë e bashkuar për zgjedhjet nën parullën “Serbia kundër Dhunës”, e lindur nga protestat.
Në këto zgjedhje, do të marrë pjesë edhe lista “Beteja politike e shqiptarëve vazhdon – Shaip Kamberi”, ku synohet që Kamberi ta marrë edhe një mandat në Parlamentin e Serbisë, si deputeti i vetëm shqiptar atje.
Megjithatë, sipas sondazheve, Partia Progresive Serbe e Vucic qëndron përpara.
Zgjedhjet e fundjavës po zhvillohen në një atmosferë të tensionuar, pas një fushate që vëzhguesit evropianë e kanë vlerësuar si të pashembullt për nga niveli i negativitetit dhe frikës, përfshi edhe shantazhin e kandidatëve opozitarë.
Sipas treguesve demokratikë, Serbia ka kohë që, përkundër orientimit të deklaruar pro-evropian, vazhdon të rrëshqasë gjithnjë e më shumë drejt autokracisë me pozicionim kundër Perëndimit.
