Skip to content

Historia e sulmit kibernetik nga Irani/ Goditja e dytë në pak javë, rreziku që vjen për Shqipërinë

Ndajeni këtë artikull me të tjerë duke klikuar ikonat më poshtë

Tre ditë nga ndërprereja e marrëdhënieve diplomatike të Iranit dhe dëbimit të gjithë punonjësve të ambasadës së republikës islamike në vendin tonë, vjen reagimi i parë. Një tjetër sulm kibernetik u regjistrua në orët e para të mëngjesit të shtunës. Këtë herë në shenjëstër ishte sistemi TIMS dhe faqja zyrtare e parlamentit.

 

Në më pak se dy muaj shërbimet online u goditën dy herë. Sulmi më i madh ishte ai i 15 korrikut. E-Albania u rrëzua duke paralizuar për ditë me rradhë 1200 shërbimet online për qytetarët.

 

“Homeland Justice”, “Drejtësi për Atdheun” pretendojnë se qëndrojnë pas sulmit kibernetik. Argumenti i sjellë nga ky grupim është, “Pse duhet të shpenzohen taksat tona për terrorristët e Durrësit”, duke iu referuar MEK, mbështetësve të opozitës iraniane, të strehuar në Manzë të Durrësit.

 

Një sërë dokumentesh u publikuan nga posta zyrtare elektronike e kryeministit Edi Rama, të Ministrisë së Jashtme, përfaqësive të saj nëpër botë, Ministrisë së Brendshme, të Mbrojtjes apo numrat e telefonave të qytetarëve shqiptarë.

 

Një ditë më parë në përfundim të hetimit, ekspertët e tekonologjisë së Microsoft deklaruan se hakerat iranianë thyen sigurinë një vit më parë. Hallka e dobët në sistemin online shqiptare sipas hetimeve ishin kompjuterat e papërditësuar prej më shumë se një viti në administratën publike duke krijuar mundësinë hakerave të depërtojnë në sistem.Kjo e dhënë e cila u bë publike për herë të parë nga Microsoft, nuk u pëmend as në deklaratën e kryeministrit Edi Rama, kur njoftoi ndërprerjen e marrëdhënieve diplomatike me Iranin.

 

Në deklaratën e 7 korrikut, kreu i qeverisë tha se agresoni kibernetik u orkestrua dhe u sponsorizua nga Republika Islamike e Iranit, me angazhimin e katër grupeve, ndër to edhe një ndër grupet më famëkeqe të terrorrizmit kibernetik ndërkombëtar.

Ndajeni këtë artikull me të tjerë duke klikuar ikonat më poshtë