Ambasadori i parë saudit në Palestinë, Nayef al-Sudairi, i dorëzoi letrat kredenciale presidentit të Autoritetit Palestinez Mahmud Abbas.
Al-Sudairi dhe delegacioni i tij shoqërues mbërritën në Bregun Perëndimor të pushtuar përmes kalimit Karama nga Jordania të martën për një vizitë zyrtare dy-ditore që do të përfundojë të mërkurën.
Ai është planifikuar të takohet me ministrin e Jashtëm palestinez Riyad al-Maliki, si dhe me Abbas dhe kryeministrin Mohammad Shtayyeh.
Ministria e Punëve të Jashtme palestineze përshëndeti të hënën vizitën e ambasadorit saudit, duke e konsideruar atë një “moment historik për zhvillimin e marrëdhënieve vëllazërore mes dy vendeve simotra”.
“Ne mirëpresim Shkëlqesinë e Tij, ambasadorin e Mbretërisë së Arabisë Saudite në Shtetin e Palestinës, i cili do të paraqesë kredencialet e tij zyrtare”, tha Sekretari i Përgjithshëm i PLO Hussein al-Sheikh, sipas agjencisë palestineze të lajmeve WAFA.
Paraqitja e letrave kredenciale
Gushtin e kaluar, al-Sudairi, i cili është ambasadori aktual i Arabisë Saudite në Jordani, u emërua përfaqësues jorezident në Palestinë dhe konsull i përgjithshëm në Jerusalem.
Një kopje e letrave kredenciale iu dorëzua më 12 gusht Majdi al-Khalidi, këshilltar diplomatik i presidentit palestinez, në një ceremoni në ambasadën palestineze në Aman, Jordani, në prani të Atallah Khairi, ambasadorit palestinez në Jordani.
Kredencialet e tij e identifikonin al-Sudairi si “Ambasador i Jashtëzakonshëm dhe Fuqiplotë i mbretit saudit Salman bin Abdulaziz në Shtetin e Palestinës dhe Konsull i Përgjithshëm i Mbretërisë në Jerusalem”, sipas WAFA.
Në atë kohë, Izraeli hodhi poshtë idenë e krijimit të një konsullate saudite në Jerusalem dhe ministri i Jashtëm izraelit Eli Cohen tha se al-Sudairi mund të takohej me përfaqësuesit e AP në Jerusalem, por nuk do të kishte një prani të përhershme.
Izraeli pretendon Jerusalemin si kryeqytetin e tij, një status i njohur nga Shtetet e Bashkuara nën Presidentin e atëhershëm Donald Trump në 2017, por jo nga komuniteti ndërkombëtar.
Autoritetet izraelite ndalojnë çdo aktivitet diplomatik palestinez në qytet.
Ambasadori i parë saudit në Palestinë
Al-Sudairi do të jetë ambasadori i parë i Arabisë Saudite në Palestinë.
Emërimi i ambasadorit saudit vjen mes raporteve se mbretëria e Gjirit po shqyrton marrëdhëniet zyrtare diplomatike me Izraelin në përgjigje të presionit të SHBA.
Megjithatë, sipas zyrtarëve amerikanë, izraelitë dhe sauditë, një marrëveshje e tillë është ende shumë larg për shkak të një numri çështjesh komplekse, si zhvillimi bërthamor saudit dhe operacionet izraelite në Bregun Perëndimor të pushtuar.
Riadi ka deklaruar vazhdimisht se do t’i përmbahet qëndrimit të Ligës Arabe për mosmarrëdhënie me Izraelin derisa të zgjidhet kriza palestineze.
