Ish-sekretari amerikan i Mbrojtjes, Donald Rumsfeld ka vdekur në moshën 88-vjeçare, njoftoi familja e tij të mërkurën.
Familja nuk zbuloi shkaqet e vdekjes, por njoftoi se ai vdiq “i rrethuar nga familja e tij në Taosin e tij të dashur në New Mexico”.
“Historia mund ta kujtojë atë për arritjet e tij të jashtëzakonshme gjatë gjashtë dekadave të shërbimit publik, por ata që e njohën më mirë dhe jeta e të cilëve u ndryshua përgjithmonë do të kujtojnë dashurinë e tij të palëkundur për gruan e tij Joyce, familjen dhe integritetin që ai solli në një jetë kushtuar vendit”, tha familja.
Rumsfeld shërbeu dy herë si udhëheqës i Pentagonit, nën presidentin Gerald Ford nga 1975 në 1977 dhe më pas nën George W. Bush nga 2001 në 2006.
Ai mbase më së miri njihet për mandatin e tij të dytë kur drejtoi Departamentin e Mbrojtjes të SHBA-së gjatë pushtimeve në Afganistan dhe Irak.
