Humbja turpëruese ndaj Polonisë, kërcënohet babai i mbrojtësit të kombëtares: Është porositur nga njerëz të fuqishëm

Humbja e Shqipërisë nda Polonisë duket se ka bërë që furia e zhgënjimit të tifozëve të bjerë dhe mbi mbrojtësin e kombëtares Ardian Ismajli. Ka qenë babai i tij i cili përmes një postimi në facebook ka denoncuar mesazhet fyese ndaj tij dhe familjes së mbrojtësit të Kombëtares pikërisht pas përfundimit të 90-minutave të lojës.

Ilmi Ismajli shkruan se qëkur djali i tij vendosi të zgjedhë Shqipërinë, mesazhet fyese nuk pushojnë në drejtim të tij. Ai shkruan se këto mesazhe janë të porositur nga njerëz të fuqishëm por pa përmendur emra.

Ismajli shkruan se këto kërcënime  nuk e pengojnë aspak djalin e tij, vetëm i japin më shumë forcë për të ecur përpara..

Postimi i Ilmi Ismajlit:

“Të dashur vëllezër, ne si familje dhe në veçanti Ardiani prej momentit që kemi zgjedhur Kombëtaren Shqiptare kemi kaluar periudha të vështira nga kërcënimet, fyerjet dhe etiketime më të ulëta që i bëhen një lojtari dhe familjes së tij dhe ende vazhdojnë. Unë besoj që kjo është e porositur edhe nga njerëz të fuqishëm.

Ne nuk kemi zgjedhë të luajmë për një shtet armik, por për nënën Shqipëri e cila është e të gjithëve ashtu siç është edhe Kosova dhe të gjitha trojet Shqiptare. Këto veprime prej më të ulëtëve neve vetëm sa na forcojnë, për Ardianin është edhe një motiv shtesë që të punoj e të arrijë majat e futbollit botëror.

Ju falënderoj të gjithëve që keni qenë pranë nesh dhe na keni përkrahur që të jemi më të fortë. Fotoja e fundit nuk ka koment. Përpara Ardian, përpara djem shqiptarë! Suksesi do të arrijë shumë shpejt vetëm të bashkuar.”