Hungaria do të zhvillojë zgjedhjet parlamentare të dielën, ku pritet që partia aktuale në pushtet “Fidesz” të dalë fituese.
Kryeministri Viktor Orban ka bërë qëndrimin e tij kundër imigracionit temë kryesore të fushatës, gjë që ka alarmuar Bashkimin Evropian.
“Brukseli do të përziejë popullatën e Evropës, do të zëvendësojë kulturën tonë dhe mënyrën tonë të jetesës,” është shprehur kryeministri.
Qindra mijëra imigrantë hynë në Hungari në vitet 2015 dhe 2016, dhe pjesa më e madhe e tyre synonin për të kaluar në Evropën Perëndimore, por kjo dyndje u pengua nga barriera kufitare që ngriti qeveria e Orban-it.
Nga ana tjetër, shihet Bashkimi Evropian me kuotat në përqindje të imigrantëve që priten të sistemohen nga çdo vend anëtar. Duke qenë se Hungaria e ka refuzuar këtë politikë, Brukseli ka kërcënuar se do të marrë masa ligjore.
Kjo përplasje ka shtuar mbështetjen e hungarezëve për politikat nacionaliste të qeverisë. Ata e shohin Orban-in si njeriun mbrojtës të vizionit të tyre për identitetin evropian.
“Ne hungarezët e konsiderojmë si vlerë kombëtare faktin që prej 1100 vjetësh jetojmë në Pellgun e Karpateve në pjesën qendrore të Evropës si një shoqëri homogjene hungareze, e krishterë,” tha ministri i jashtëm i Hungarisë.
Orbani me qëndrimin e tij të palëkundur kundër imigracionit dhe retorikën e fortë ka fituar një përkrahje të qartë të hungarezëve, që mendohet t’i sigurojë të dielën një mandat të ri qeverisës.
