Punën e mësoi nga i ati Ramazani, mjeshtër akordues i pianove në Universitetin e Arteve. Dëshira për të qenë pjesë e këtij profesioni i ka lindur që në vegjëli, ashtu si pasioni për muzikën.
Kështu thotë Erli Gurra, mbase i vetmi mjeshtër violinëbërës në Shqipëri.
“Pasioni për luterinë ose mjeshtërinë e bërjes së violinës tek unë është trashëguar. Babai im Ramazan Gurra, është mjeshtër akordues pianosh në Universitetin e Arteve, gjyshi im ka qenë kompozitor i muzikës popullore qytetarë, po ashtu edhe stërgjyshi dhe katërgjyshi kanë qenë personazhe që janë marrë me rregullimin, restaurimin dhë bërjen e instrumentave popullore. ”-tregoi në intervistë për Top Channel Gurra.
Por për të prodhur një instrument muzikor si violina, është një orvatje që kërkon durim.
“Në 2003 regjistrohem në shkollën e Kremonës (Itali) pranë Institutit Antonio Stradivari, që është shkolla më e famshme në botë që është për konstruksionin e instrumenteve me harqe”-tregon Erli.
Për të nxjerrë një violinë të mirë çfarë duhet të kesh parasysh?
Aftësia që ne kemi për ta kuptuar dhe dëgjuar drurin duke e punuar është ajo që ne mjeshtrat lutajo kemi në diferencë nga të tjerët për ta bërë një violinë super të mirë.
Si e kupton ti cilësinë akustike?
Nëpërmjet duarve të mia unë kuptoj vibrimin e drurit. Ky është një moment ku druri ‘komunikon’, se ku duhet të vazhdoj punën.
Sa kohë të duhet për të prodhuar një violinë?
Afërsisht një muaj, ndërsa violinçeli kërkon 3-4 muaj.
Violinat Made in Albania ku i gjejmë?
“Në të gjithë botë dhe në çdo kontinent.”- përfundon Erli.