20 Mars – Përmirësimi infrastrukturës turistike dhe zhvillimi aseteve natyrore e kulturore në jug të Shqipërisë, për krijimin e mundësive të punësimit dhe rritjen e mirëqenies së banorëve në këto zona, është në fokus të projekteve që po zbaton qeveria.
Konkretisht projekti “Zhvillimi i Integruar Urban dhe Turizmin” që po zbatohet në katër bashki të jugut të vendit; Berat, Përmet, Gjirokastër dhe Sarandë, po punon për rikonstruksionin e rrugës pedonale që të çon në kalanë e Beratit.
Rruga këmbësore për në kalanë e Beratit “Mihal Komneno” është një ndër disa objektet që po rikonstruktohet si pjesë e një sërë ndërhyrjeve të integruara të parashikuara në këtë qytet.
Këto ndërhyrje po kryhen në kuadër të projektit “Zhvillimi i Integruar Urban dhe Turizmin” i financuar Qeveria shqiptare dhe Banka Botërore.
Krahas “Mihal Komnenos”, do të rikonstruktohet rruga automobilistike “Muzak Topia”, do të rehabilitohet zona e Gorricës dhe hapësira të tjera brenda dhe jashtë zonës historike me qëllim përmirësimin e aksesit dhe ndërlidhjes të zonave të ndryshme të qytetit.
Projekti po zbatohet nga Fondi Shqiptar i Zhvillimit dhe ka për qëllim përmirësimin e infrastrukturës së qytetit të Beratit, i cili është shpalluar Qytet Muze në vitin 1961 nga Qeveria Shqiptare dhe në vititn 2008 iu shtua Listës së Trashëgimisë Kulturore të UNESCO-s, si një shembull i rrallë i një qyteti të periudhës Otomane.
Berati është një qendër historike e fortifikuar, i cili dëshmon pasurinë dhe diversitetin e trashëgimisë arkitekturore të rajonit.
Qendra urbane e qytetit ka dëshmi të jashtëzakonshme të llojeve të ndryshme të monumenteve dhe ndërtesa urbane që i takojnë periudhës Klasike Otomane, cka e bëjnë këtë qytet një atraksion specifik dhe mjaft të dëshiruar jo vetëm për vizitorët vendas por dhe turistët e huaj nga mbarë bota. e.xh/ /a.g/
