NIKOLETA KOVAÇI/ Akti brutal i vrasjes së Eglantin Progës në Pogradec pasditen e 10 gushtit ka zhytur në përplasje publike institucionet përgjegjëse.
Dje, nga Tirana, kryepolici i vendit, Muhamet Rrumbullaku, doli në një konferencë për shtyp, ku jo vetëm e quajti skandaloze dyshimin se ngjarja ishte fshehur nga shefi i komisariatit të Pogradecit, por ai ia kaloi “topin” prokurorisë duke thënë se ngjarja ishte referuar si “Vrasje me dashje”! Po ashtu, ai tha se ngjarja u zbardh në kohë rekord, ku u bë i mundur edhe arrestimi i katër personave, gjë që në fakt nuk është pranuar nga prokuroria, sipas së cilës të katër personat e dalë para gjykatës ditën e martë, janë vetëdorëzuar në komisariat.
Rrumbullaku ia la fajin prokurores së çështjes për ndryshimin e veprës penale dhe menjëherë pas tij, reagoi edhe Gjykata e Korçës, sërish duke e lënë topin në fushën e prokurorisë në lidhje me klasifikimin e veprës penale. Mirëpo, orëve të vona të pasdites së djeshme erdhën edhe dy reagime të njëpasnjëshme të Prokurorisë së Korçës. Në të parën organi i akuzës sqaronte rrethanat e faktit që kishin çuar në klasifikimin e aktit si vrasje nga pakujdesia dhe në njoftimin e dytë tregonte se kishte nisur hetimet për një inspektor policie, i cili sipas tyre, kishte shpërdoruar detyrën në mbledhjen e provave.
Prokuroria bën me dije se në atë fazë të referimit policor nuk u gjenden elementët e vrasjes me dashje, ndërkohë që pretendohet se tashmë hetimet do të vijojnë dhe do të ndërmerren hapa të tjerë për të sqaruar plotësisht këto rrethana. Prokuroria e Korçës reagoi më shumë se 24 orë me vonesë nga dalja para gjykatës së autorit të krimit dhe të 3 miqve të tij, të cilët kanë dëshmuar se nuk e kanë mik vrasësin e Egli Progës dhe nuk e kuptojnë se si e ka vrarë vetëm me një grusht. Materiali hetimor që Prokuroria e Korçës e shpërndau vetëm “nën dorë” ditën e martë dëshmon se dokumentimi i ngjarjes është kryer pa asnjë lloj prove dhe me dëshmi të vakëta nga vendi i krimit, ndërsa nuk është bërë e mundur hapja e asnjë kamere në vendin, ku ka ndodhur vrasja. Policia dhe as prokuroria nuk kanë paraqitur asnjë fakt që dëshmon ndonjë konflikt mes autorit e viktimës, duke e lënë ngjarjen në një përplasje mes dy personash të dehur!
PROKURORISË SË KORÇËS-RRETHANAT E FAKTIT
Për të sqaruar opinionin publik dhe duke iu përgjigjur interesit të lartë të medias dhe shoqërisë civile në lidhje me ngjarjen e ndodhur më 10.08.2024, ku shtetasi E.P. është gjetur pa shenja jete në qytetin e Pogradecit, Prokuroria e Shkallës së Parë të Juridiksionit të Përgjithshëm Korçë bën me dije se ka regjistruar procedimi penal nr.980 për veprën penale “Vrasje nga pakujdesia”, parashikuar nga neni 85 i Kodit Penal në ngarkim të shtetasit D.M.
Nga materiali i referuar nga Drejtoria Vendore e Policisë Korçë, bëhet me dije se në datë 10.08.2024, rreth orës 19:00, është marrë njoftim se në afërsi të vendit të quajtur “Agjencia”, tek rreth-rrotullimi, lagjja nr.2 në Pogradec, është gjetur një shtetas i shtrirë pa ndjenja, i cili pas mbërritjes së punonjësve të policisë lokale, është identifikuar shtetasi E.P.. Menjëherë janë marrë deklarimet e shtetasit A.B., kushëriri i viktimës, i cili deklaroi se ka qenë në një largësi rreth 30 metra kur ka parë që një person ka qëlluar me grusht një person tjetër dhe ai u rrëzua në tokë. Ai deklaroi se nuk u afrua po pa që doli pronari i lokalit, shtetasi V. Sh. dhe i ofroi ndihmë të dëmtuarit.
Po kështu, u morën deklarimet e shtetasit A.Sh., i pranishëm në ambientet e brendshme të lokalit, i ulur në të njëjtën tavolinë me viktimën, i cili deklaroi se, kur ka ardhur viktima në lokal, dukej në gjendje në dehur, fillimisht të dy me të dyshuarin po bënin shaka me njëritjetrin dhe më pas viktima filloi të përdorte fjalë ofenduese ndaj të dyshuarit dhe ky i fundit i tha të dilnin pak jashtë të sqaroheshin. Ai deklaroi se pa nga xhami i lokalit që i dyshuari e goditi me grusht viktimën, i cili ra fillimisht në anën e një makine dhe më pas në tokë .
U morën deklarimet e shtetasve V.Sh., A. M. dhe L. G. të cilët deklaruan se nuk e panë ngjarjen, por shkuan pranë viktimës pasi dëgjuan të bërtitura. Gjithashtu u krye këqyrja e jashtme e viktimës, gjatë së cilës u konstatuan dëmtime në pjesën e fytyrës, në krahun dhe këmbën e majtë, por nuk përcaktohet shkaku i këtyre dëmtime, nëse është si rezultat i goditje me grushte, me sende të tjera, apo nga rrëzimi i trupit të lirë të viktimës në trotuar dhe mundësia e përplasjes ndërkohë me ndonjë send. Në lidhje me këtë çështje priten përgjigje nga Instituti i Mjekësisë Ligjore.
Pasi u bë identifikimi i shtetasit D.M. si autor i dyshuar që dëmtoi shtetasin E. P., u kryen veprime operative dhe teknike të tjera me qëllim gjetjen e vendndodhjes së tij, deri në momentin që ai u paraqit vetë pranë Komisariatit të Policisë Pogradec. Në deklarimin e tij, shtetasi D. M., shprehet se nuk ka pasur si qëllim vrasjen e shtetasit E.P., ka tentuar ta godasë, por nuk e ka goditur, pasi ai është rrëzuar direkt vetë në tokë. Më pas i çorientuar është larguar. Këto janë provat që janë përcjellë nga policia pranë Prokurorisë Korçë.
Në bazë të nenit 244 të K.Pr.Penale, seanca e zhvilluar nga gjykata ka qenë për vleftësimin e arrestimit dhe caktimin e masës së sigurimit personal për shtetasit nën hetim, seancë gjatë së cilës vleftësohet nevoja për caktimin e një mase sigurimi ndaj personit, për të siguruar që nuk do të prishë provat, nuk do të largohet, apo nuk do të kryeje vepra të tjera penale. Në këto kushte, ndaj shtetasit D. M., që nga provat e deritanishme rezulton autor i ngjarjes, u kërkua dhe caktua masa e sigurimit ‘arrest në burg’. Ndërsa për personat e tjerë të arrestuar për moskallëzim krimi (vepër e dënueshme deri në 3 vjet burgim), në kushtet kur provat kanë qenë të pakta në ngarkim të tyre, u caktua masa e sigurimit detyrim për t’u paraqitur në Policinë Gjyqësore. Në rastin konkret, Prokuroria pranë Gjykatës së Shkallës së Parë të Juridiksionit të Përgjithshëm, Korçë, po kryhen ende veprime hetimore për sqarimin e plotë të rrethanave të ngjarjes, veprimeve të ndërmarra ndaj viktimës, nga çdo person që mund të ketë qenë i përfshirë, që mund të jenë edhe persona të tjerë nga ata që janë referuar nga policia.
Nga prokuroria do të merren të gjitha provat e nevojshme për të konkluduar me akuzë ndaj shtetasve nën hetim, të cilët do të merren si të pandehur, për vepra penale që mund të jenë të ndryshme nga ato për të cilat është regjistruar procedimi penal. Ndryshimi në regjistër i veprës penale mund të kryhet në çdo moment nga prokurori në bazë të provave që do të merren. Theksojmë që ende nuk është administruar në dosjen hetimore akti i ekspertimit mjekoligjor, provë thelbësore për ngjarjen, si dhe po punohet në lidhje me pamjet filmike. Gjithashtu nga prokuroria po punohet intensivisht për kryerjen e veprimeve të nevojshme hetimore për të sqaruar të gjitha rrethanat e ngjarjes dhe personat e përfshirë dhe rolin e tyre.
Nga prokuroria fillimisht është regjistruar procedimi për veprën penale “Vrasje nga pakujdesia”, parashikuar nga neni 85 i Kodit Penal, kjo edhe në referim të praktikës gjyqësore në raste të ngjashme, duke vlerësuar që nga materialet e referuara nga policia, goditja me grusht (siç ka rezultuar nga dëshmitë, autori i dyshuar e ka goditur vetëm një herë me grusht viktimën), nuk tregon vullnetin e viktimës për të vrarë një person, përndryshe prej tij do të ishte zgjedhur me shumë mundësi një send tjetër për të realizuar qëllimin e tij kriminal, por vetëm për ta dëmtuar atë, ndërsa vrasja me dashje kërkon qëllimin e viktimës për ta vrarë personin, duke marrë edhe sendet e nevojshme për ta realizuar qëllimin e tij. Nga aktet e para të administruara në dosje dyshimi krijohej për veprën penale “Vrasje nga pakujdesia”, parashikuar nga neni 85 i Kodit Penal. Sqarojmë se, në momentin që materialet e policisë përcillen në Prokurori,prokurori i vlerëson ato dhe e regjistron procedimin për veprën penale që ka dyshim në atë moment dhe vetëm mbi provat e para që janë marrë. Nga provat që do të merren në vijim, do të bëhet edhe regjistrimi përfundimtar i veprës penale si dhe do të njoftohet akuza personave të pandehur.
NJOFTIMI TJETËR-HETIMI I INSPEKTORIT
Nuk mori masa për dokumentimin e ngjarjes ku humbi jetën shtetasi E.P. Prokuroria e Korçës merr nën hetim Inspektorin për ‘Shpërdorim Detyre’. Prokuroria pranë Gjykatës së Shkallës së Parë të Juridiksionit të Përgjithshëm Korçë merr nën hetim shtetasin A.L. i dyshuar për veprën penale “Shpërdorimi i Detyrës” parashikuar nga neni 248 i Kodit Penal. Shtetasi në fjalë, me detyrë inspektor, Trupë Shërbimi, Patrullë e Përgjithshme rezulton se nuk mori asnjë masë për të dokumentuar apo bërë prezent shkakun e vdekjes së shtetasit E.P. më 10.08.2024 në Pogradec.
Më datë 10.08.2024, rreth orës 19:00, është marrë njoftim se në afërsi të vendit të quajtur “Agjencia”, tek rreth-rrotullimi, lagjja nr.2 në Pogradec, u gjet një shtetas i shtrirë pa ndjenja. Pas mbërritjes së punonjësve të policisë lokale u identifikua si shtetasi E.P., i cili u transportua në spital pa shenja jete. Lidhur me ngjarjen janë pyetur shtetasit V.Sh., A.B., A.Sh., R.B., L.G., A.M., dhe D.M.. Nga deklarimi i shtetasit A.B., rezultoi se në momentin që ka qenë në spital ku ka shoqëruar viktimën, ka dëgjuar duke folur në telefon inspektorin, A.L., i cili ka komunikuar faktin se një person është i pirë dhe është rrëzuar. A.B. i ka thënë se kushëriri i tij (viktima) ishte goditur, por inspektori i ka thënë ‘ore ik andej’.
Veprimet hetimore paraprake të cituara më lart, të kryera në funksion të një hetimi të plotë dhe të gjithanshëm të kësaj çështjeje penale, kanë krijuar një dyshim të arsyeshëm të bazuar në prova se nga ana e shtetasit A.L. janë konsumuar elementë të veprës penale “Shpërdorimi i detyrës”, parashikuar nga nenit 248 i Kodit Penal, për shkak se ky shtetas me detyrë inspektor, trupë shërbimi, Patrullë e Përgjithshme, në shkelje të detyrave të tij funksionale, nuk ka ndërmarrë asnjë masë për të dokumentuar apo bërë prezent shkakun e vdekjes së viktimës, edhe pse ky shkak i është bërë prezent nga dëshmitari okular i ngjarjes shtetasi A.B..
Gjithashtu, rezulton e provuar se prokurorit të gatshëm i është raportuar paraprakisht fakti se nga Salla Operative është marrë njoftim se një person i dehur i moshës rreth 37 vjeç është rrëzuar dhe për pasojë ka ndërruar jetë në Spitalin Rajonal të Pogradecit. Në këto rrethana, shtetasi i sipërpërmendur u mor në përgjegjësi penale për veprën penale të dyshuar të kryer prej tij, për shkak se si pasojë e veprimeve të tij nuk është bërë i mundur dokumentimi real i ngjarjes së ndodhur.
