Greqia po miraton një qëndrim më të vendosur në lidhje me kushtet për hyrjen e Shqipërisë në Bashkimin Evropian lidhur me rastin e Fredi Belerit.
Kështu shkruan në artikullin e saj gazeta greke eKathimerini, ndërsa e përshkruan çështjen e kryebashkiakut të zgjedhur të Himarës në këtë mënyrë:
“Një grek etnik i zgjedhur si kryetar i Bashkisë së Himarës në Shqipërinë e Jugut gjatë zgjedhjeve komunale të 14 majit, megjithëse u pengua të betohet për shkak të një arrestimi për blerjen e supozuar të votës dy ditë para zhvillimit të zgjedhjeve.”
Gjatë një takimi të mbajtur të mërkurën e 29 Nëntorit, me ambasadorët e 27 vendeve anëtare të Bashkimit Evropian, të njohur si COREPER, Greqia lëshoi një deklaratë me shkrim duke deklaruar se betimi i Belerit, aktualisht në paraburgim në pritje të gjykimit, do të shërbente si një parakusht për të ardhmen e Shqipërisë në BE sa i përket procesit të anëtarësimit.
Athina e sheh rastin si provë të shkeljes së kushteve që duhet të përmbushë një shtet kandidat për hyrjen në bllok.
