Të paktën 5 persona janë arrestuar në provincën Fars të Iranit me arsyetimin se kanë përdorur gaz helmues në shkolla.
Sipas Agjencisë së Lajmeve të Studentëve Iranianë (ISNA), zëdhënësi i policisë iraniane Said Muntazarulmahdi ndau detajet e para të ndalimeve në lidhje me rastet e helmimit të studenteve, gjë që ka shkaktuar shqetësim në të gjithë vendin.
Muntazarulmahdi tha se “5 persona, 3 prej të cilëve janë gra, u arrestuan në lagjen Laristan të provincës Fars për hedhjen e substancave helmuese në kopshtin e shkollave të vajzave”.
Duke thënë se është konstatuar se të dyshuarit kanë hedhur gaz azot në kopshtet e 7 shkollave të rrethit, Muntazarulmehdi tha se 3 gratë kanë regjistruar veprimet e tyre, të cilat kanë shkaktuar helmimin e 53 nxënësve dhe i kanë dërguar në televizionin “Iran International”, i cili shquhet për kundërshtimin e tij ndaj regjimit iranian.
Ai theksoi se të dyshuarit gjatë marrjes në pyetje thanë se qëllimi i tyre ishte “të krijonin një perceptim negativ për administratën iraniane dhe të krijonin mosbesim në shkolla”.
Zëvendësministri i Brendshëm, Majid Mirahmedi, në deklaratën e tij të djeshme tha se disa persona për të cilët është konstatuar se kanë lidhje me helmimin masiv të studentëve janë ndaluar nga ekipet e inteligjencës në 5 provinca të vendit.
Rastet e helmimeve masive në shkolla në Iran
Që nga 30 nëntori 2022, ka pasur raste të helmimit masiv në shkollat ku kryesisht shkollohen nxënëse femra në Iran. Nxënësit shfaqin simptoma të tilla si vështirësi në frymëmarrje, të përziera, dhimbje koke dhe mpirje në gjymtyrë.
Presidenti i Iranit, Ebrahim Raisi ftoi ministrin e Brendshëm Ahmed Vahidi, ministrin e Inteligjencës Esmaeil Khatib dhe ministrin e Shëndetësisë Bahram Eynollahi më 1 mars për të hetuar burimin e rasteve të dyshimta.
Në një deklaratë më 3 mars, Raisi tha se “armiqtë e Iranit” ishin përgjegjës për helmimin e studenteve. “Sot armiqësitë janë shtuar me përparimin e vendit. Shembulli i fundit i kësaj është përpjekja për të krijuar atmosferë pasigurie në shkolla dhe ankth në familje”, tha ai.
Udhëheqësi i Iranit, Ayatollah Ali Khamenei, në një deklaratë tha se ai kishte udhëzuar autoritetet që “të marrin seriozisht incidentin dhe të ndëshkojnë autorët me dënimin më të rëndë”.
Kreu i Gjyqësorit, Gulam Hossain Muhsini Ejei tha se autorët e rasteve të helmimit do të dënohen me “ekzekutim”.
Anëtari i Komisionit Hetimor Parlamentar të Iranit për rastet e helmimeve, Mohammad Hasan Asferi, deklaroi dje se më shumë se 5 mijë nxënës, kryesisht vajza, janë helmuar në 230 shkolla në 25 provinca që nga 30 nëntori 2022.
Burimi: AA
