Ish-drejtori Byrosë Federale Investigative të SHBA-së (FBI), James Comey, në një intervistë në lidhje me përvojën e bashkëpunimit me Donald Trump ka thënë se ky i fundit nuk është i përshtatshëm moralisht për detyrën e presidentit.
I emëruar në krye të FBI-së gjatë mandatit të ish-presidentit amerikan Barack Obama dhe i shkarkuar nga detyra nga ana e presidentit aktual Trump, Comey ishte mysafir në televizionin ABC në lidhje me librin e tij të sapoplasuar në treg “Besnikëri më e lartë: E vërteta, gënjeshtrat dhe lidershipi”.
Në intervistën speciale me drejtuesin e programit George Stephanopoulos, Comey theksoi se Trump nuk posedon një botëkuptim qeverisjeje që vendos në qendër të vërtetën, duke u bazuar në përvojat që ka fituar gjatë periudhës që ka kaluar në adminstratën e tij.
“Vlerat janë të përshtatshme, kurse ky president nuk i reflekton vlerat e këtij vendi”, tha Comey.
Comey po ashtu tha se kanë gjetur që në duar të rusëve gjenden dokumente shantazhimi në lidhje me Trump dhe se këtë çështje e kanë diskutuar me ish-presidentin Obama dhe liderët e inteligjencës.
Ai tha se këtë çështje ia ka transmetuar edhe presidentit Trump gjatë një takimi pas ardhjes në detyrën e presidentit.
“Ia shpjegova atij pretendimet se ka qenë me prostituta në një hotel kur ka shkuar në Moskë në vitin 2013 për garën e Miss Universit dhe se rusët e kanë regjistruar për shantazhim këtë”, u shpreh Comey.
Ish-shefi i FBI-së tha se Trump i ka përgënjeshtruar pretendimet duke reaguar me fjalët: “Vallë, i ngjaj një njeriu që ka nevojë të jetë së bashku me prostituta?” , shkruan aa. Ndërkaq, Comey tha se i ka shpjeguar gjendjen presidentit amerikan Trump duke thënë se detyra e FBI-së është të mbrojë presidentin nga kërcënimet dhe shantazhimi dhe se janë përpjekur ta paralajmërojnë në lidhje me kërcënimin dhe të sigurojnë mbrojtje në përputhje me të.