Nderim Kurti është një prej personave që u ndalua pasi mori pjesë në protestat për vrasjen e Klodian Rashës nga një efektiv policie. Në një intervistë për Fax News, ka rrëfyer se si ndodhi ndalimi deri tek momenti që u lirua me ndihmën e avokatëve Altin Goxhaj dhe Redon Meksi.
Kurti rrëfehet se arsyeja e ndalimit ka qenë teksa po ecte në rrugë me një kapele që tregon se është pjesë e organizatës civile dhe më pas e kanë mbajtur në rajon duke thyer të gjitha rregullat për parandalimin e koronavirusit.
Në fjalën e tij thekson se i morën celularin duke i zhdukur të gjitha provat që kishte për të mbrojtur veten dhe në qelinë ku qendronte me 16 persona të tjerë, ushtruan dhunë fizike.
“Arsyeja përse kam protestuar është e njëjtë me të cdo qytetari. Qytetari që është ekzekutuar nga polici është 25 vjec dhe e kam ndjerë veten në vendin e tij. Ishte e domosdoshme që të thonim se nuk e tolerojmë këtë sjellje. Por historia ime nis që nga 15 Maji që marr vesh që po zhvillohej një përkujtimore në nder të familjes dhe e dija që e organizon Altin Goxhaj dhe bëra një poezi.
Pasi lexova poezinë, jam nisur për në punë. Kam vënë re që 3 policë civilë po më ndiqnin me vrap derisa më kapën në një pikë qorre. Kanë qenë protestues që janë arrestuar. Këto në mendimin tim janë policë që të përndjekur për arsye specifike dhe mendoj që kam qenë duke ecur me një kapele me një citat “Make Albania Great Again” dhe kanë menduar se jam anëtar i organizatës dhe arrestuar ka qenë me plan.
Adresa ku jam arrestuar ka qenë nga Xhorxh Bush tek Ushtari i Panjohur. Kam protestuar të tre ditët e protestës. Në asnjë mënyrë nuk kam bërë akt vandal. Unë kam bërë filmim live gjatë 3 ditëve.
Pretendimi ka qenë që kemi qenë pjesëmarrës në protestë, dhe më pas kanë hedhur nene sipas mendjes së tyre që kemi pasur armë piroteknike e kemi bërë akte vandale, por kanë qenë krejtësisht pa baza dhe të pa mbështetur në deklaratë.
Jemi nisur drejt komisariatit numër 1 dhe njëri nga policët më ka kontrolluar e më ka sekuestruar celularin se kisha prova që mund të mbroja veten dhe kisha kodet e databazës për punën time. Celulari mund të më jetë thyer e marrë dhe në rajon më kanë thënë që nuk kam pasur asnjë send me vlerë. Në rajon kanë vijuar me dhunime me pothuajse të gjithë protestuesit që kisha në qeli.
Gazi lotsjellës dhe uji duket se e agravonin më shumë situatën. Kanë qenë shumë persona në një qeli, i thyenin rregullat sepse ishin gati 16 veta në një dhomë dhe më pas kanë bërë manipulim duke fshehur sendet me vlerë”, tha Kurti. (A.M/Faxweb.al)
/faxweb
