Policia ka vënë në pranga një 62-vjeçar nga Mirdita, të cilit iu gjet në banesë një armë zjarri kallashnikov me krehër dhe fishekë në të.
Armën që e kishte pa leje dhe municionin luftarak, policia e sekuestroi në cilësinë e provës materiale.
Arrestimi i 62-vjeçarit erdhi në kuadër të operacionit “Sundimi i ligjit”, kundër armëmbajtjes pa leje.
Njoftimi i policisë:
Rrëshen/Vijon intensivisht megaoperacioni “Sundimi i ligjit”, kundër armëmbajtjes pa leje.
Mbante në banesë 1 kallashnikov, si rezultat i inteligjencës policore, kapet në flagrancë dhe vihet në pranga poseduesi i armës.
Sekuestrohet arma e zjarrit me municion luftarak.
Si rezultat i administrimit të menjëhershëm të informacioneve nga inteligjenca policore, të siguruara në kuadër të megaoperacionit “Sundimi i ligjit”, se një shtetas mbante pa leje, armë zjarri, në banesën e tij në fshatin Shëngjergj, shërbimet e Komisariatit të Policisë Mirditë finalizuan operacionin policor të koduar “Zona”.
Gjatë operacionit u arrestua në flagrancë shtetasi Gj. H., 62 vjeç. Nga kontrollet në banesën e këtij shtetasi, Policia gjeti 1 armë zjarri kallashnikov me krehër dhe fishekë në të, që posedoheshin pa leje.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.