Një grup arkeologësh nga Izraeli kanë nxjerrë në dritë rrënojat e një xhamie të ndërtuar mëse 1200 vite më parë, duke e bërë objektin një ndër xhamitë më të vjetra, të njohura në botë.
Xhamia, e cila besohet se i përket shekullit të 7-të, u zbulua teksa po kryheshin gërmime përpara se të niste puna për të ndërtuar një lagje të re në qytetin e Rahat (zona jugore e Izraelit).
“Ajo që është unike në këtë xhami, është larmia e qeramikave të shekullit të 7-të në këtë zonë, duke e bërë kësisoj godinën një ndër xhamitë më të vjetra në botë”–shpjegoi Doktor Elena Kogn-Zehavi, një prej autoriteteve të Institutit të Antikitetit.
Xhamia u zbulua disa kilometra larg një tjetër xhamie të vjetër (e zbuluar në vitin 2019). Sipas arkeologëve, zbulimi i fundit ka rëndësi madhore, jo vetëm për vjetërsinë e xhamisë, por edhe për faktin se hedh dritë, sesi islami u përhap në fundin e epokës bizantine.
Hollet e faljes janë identifikuar në xhami falë elementëve të tyre strukturalë dhe faktit se një prej mureve ‘sheh’ në drejtim të Mekës. Dr. Kogan-Zehavi shpjegoi për median në Izrael, se fatmirësisht janë gjetur një sërë qeramikash. Këto të fundit i përkasin shekullit të shtatë dhe të tetë. Ajo tregoi se tashmë studiuesit munden të krijojnë një peisazh të qartë të tranzicionit nga krishtërimi bizantin në islam.
“Islami erdhi shumë shumë herët në veri të Negev-it dhe nisi të jetojë përkah zonave kristiane”-tha më tutje arkeologia.
Veç xhamisë, arkeologët zbuluan dhe një shtëpi- fermë të epokës bizantine, që nga dukja i ngjante një godine kristiane. Në kodrën ngjitur ku u zbulua xhamia e ferma në fjalë, ndodhej një tjetër ndërtesë, e krijuar me gjasë disa qindra vite më vonë (shek.7-9). Godina, e ndërtuar nga muslimanë, kishte disa dhoma në radhë, të cilat lidheshin me një oborr të hapur.
“Të gjitha pyetjet i gjen e shikon atje në zonën arkeologjike. Është detyra jonë tashmë, që të krijojmë mozaikun e të kuptojmë se çfarë ka ndodhur”-shpjegoi më tutje Zehavi.
