Autoritetet izraelite miratuan sot ndërtimin e 4.000 njësive të banimit në territoret në Bregun Perëndimor të pushtuar dhe Kudsin Lindor.

Disa media izraelite të lajmeve, duke përfshirë gazetën Haaretz, thanë se Këshilli i Lartë izraelit i Planifikimit dhe Ndërtimit, një organ zyrtar izraelit që mbikëqyr ndërtimin e vendbanimeve kolone në territoret e pushtuara palestineze, miratoi ndërtimin e njësive të reja të banimit.

Njësitë e reja do të ndërtohen në vendbanimet ekzistuese Betar Illit në Kudsin jugperëndimor, vendbanimin Elkana në Bregun Perëndimor veriperëndimor, vendbanimin Doliv në Ramallahun veriperëndimor, Kiryat Arba në lindje të El-Halilit (Hebron) dhe të tjera, raportojnë mediat izraelite.

Jordania kritikoi njoftimin izraelit për ndërtimin e banimeve të reja kolone duke vazhduar të shkatërrojë shtëpitë në pronësi të Palestinës në Bregun Perëndimor të pushtuar.

Në një deklaratë, zëdhënësi i Ministrisë së Jashtme jordaneze Haitham Abu Alfoul tha se vendi i tij i kundërshton dhe i dënon këto veprime si të paligjshme dhe jolegjitime.

E drejta ndërkombëtare i sheh Bregun Perëndimor dhe Kudsin Lindor si territore të pushtuara dhe i konsideron të paligjshme të gjitha aktivitetet e ndërtimit të vendbanimeve hebreje atje.

Vlerësimet izraelite dhe palestineze tregojnë se rreth 650.000 kolonë jetojnë në Bregun Perëndimor, duke përfshirë Kudsin e pushtuar.
Burimi: AA