Kolumbia i ka kërkuar Gjykatës Ndërkombëtare të Drejtësisë (GJND) leje për t’iu bashkuar çështjes së Afrikës së Jugut kundër Izraelit për gjenocid në Rripin e Gazës.
Në kërkesën e saj në gjykatë, Kolumbia i bëri thirrje GJND-së të garantojë “sigurinë dhe, në të vërtetë, vetë ekzistencën e popullit palestinez”.
“Kolumbia po bën përpjekje për të luftuar plagën e gjenocidit dhe, si rezultat, kërkon të sigurojë që palestinezët të gëzojnë të drejtën e tyre për të ekzistuar si popull”, thuhet në dokument.
“Qëllimi përfundimtar i Kolumbisë në këtë përpjekje është të sigurojë mbrojtjen e menjëhershme dhe sa më të plotë të mundshme për palestinezët në Gaza, veçanërisht për popullatat e cenueshme si gratë, fëmijët, të paaftët dhe të moshuarit”, shtoi deklarata kolumbiane.
GJND-ja, gjykata më e lartë e Kombeve të Bashkuara, mund t’i lejojë shtetet të ndërhyjnë në çështje dhe të japin mendimin e tyre.
Disa vende, si Irlanda, kanë thënë se do të kërkojnë gjithashtu të ndërhyjnë në këtë rast, por deri më tani vetëm Kolumbia dhe Nikaragua kanë bërë një kërkesë zyrtare.
“Kolumbia kërkon të ndërhyjë në mënyrë aktive në proces, duke mbështetur Republikën e Afrikës së Jugut. Ajo shpreson të ofrojë mbështetje të prekshme për kauzën palestineze duke i dërguar gjithashtu një mesazh Izraelit se nuk mund të vazhdojë veprimet e tij në Gaza,” tha korrespondenti i Al Jazeera-s Alessandro Rametti, duke raportuar nga Bogota.
Ky nuk është një qëndrim befasues duke marrë parasysh atë që kemi dëgjuar nga Presidenti i Kolumbisë, Gustavo Petro. Që nga fillimi i luftës, ai e dënoi Izraelin; ai ishte presidenti i parë i Amerikës së Jugut që foli për gjenocid, duke dënuar veprimet e Izraelit në Gaza.
Ftesat e GJND-së u shpërfillën
Javën e kaluar, gjyqtarët e GJND-së urdhëruan Izraelin të merrte të gjitha masat e nevojshme dhe efektive për të siguruar që furnizimet thelbësore ushqimore të arrijnë te palestinezët në Gaza pa vonesë.
Në janar, GJND-ja me bazë në Hagë, e njohur gjithashtu si Gjykata Botërore, urdhëroi Izraelin të përmbahej nga çdo akt që mund të binte nën Konventën e Gjenocidit dhe të sigurojë që forcat e tij të mos kryejnë akte gjenocidale kundër palestinezëve në Gaza.
Forcat izraelite në Gaza kanë vrarë të paktën 33,091 njerëz deri më tani, kryesisht gra dhe fëmijë, sipas Ministrisë së Shëndetësisë së Gazës.
Qindra mijëra palestinezë janë zhvendosur gjithashtu dhe organizatat humanitare paralajmërojnë se Rripi është në prag të urisë.
Fushata ushtarake e Izraelit në Gaza ka sjellë “vdekje dhe shkatërrim të pamëshirshëm” për palestinezët, tha të premten Sekretari i Përgjithshëm i OKB-së Antonio Guterres në një fjalim që shënoi gjashtë muaj nga fillimi i luftës në Gaza.
Afrika e Jugut nisi rastin e saj duke akuzuar Izraelin për gjenocid shtetëror në Gaza në dhjetor. Avokatët e Izraelit e hodhën poshtë atë si një abuzim të Konventës së Gjenocidit.
