Nuk ka rëndësi çfarë moshe keni, apo sa vite keni që pini duhan. Lënia e duhanit rrit cilësinë e jetës suaj dhe ju ndihmon të jetoni më gjatë.
Sipas studimeve mjekësore, duhanpirësit që e lënë duhanin përpara moshës 50 vjeç, ulin me dy herë rrezikun e vdekjes, krahasuar me ata që vazhdojnë të pinë duhan. Specialistët e Institutit të Shëndetit Publik, bëjnë me dije se: ish-duhanpirësit kanë cilësi më të lartë jete, më pak sëmundje nga viruset e gripit, dhe mundësi më të pakta për t’u sëmurur nga bronshiti dhe pneumonia.
Lënia e duhanit ul rrezikun për t’u prekur nga kanceri i mushkërive, i gjirit, apo lloje të tjera kanceri, si dhe nga ataku në zemër, apo sëmundje të tjera të mushkërive.
Konkretisht, përfitimet nga lënia e duhanit janë:
20 minuta pas lënies, rrahjet e zemrës dhe presioni i gjakut normalizohen.
12 orë pas lënies, niveli i monoksidit të karbonit në gjak ulet dhe shkon në nivel normal.
2 javë deri në 3 muaj pas lënies, qarkullimi i gjakut përmirësohet dhe përmirësohet funksionimi i mushkërive.
1-9 muaj pas lënies, largohet kolla dhe pastrohen mushkëritë, si dhe reduktohet rreziku për infeksione.
1 vit pas lënies, rreziku i lartë i sëmundjeve koronare të zemrës përgjysmohet në krahasim me ata që vazhdojnë të pinë duhan.
5 vjet pas lënies, krahasuar me një duhanpirës, përgjysmohen gjasat për infarkt.
10 vjet pas lënies, përgjysmohet rreziku për t’u prekur nga kanceri i mushkërive, ulet rreziku për t’u prekur nga kanceri i gjirit, i ezofagut dhe i pankreasit.
15 vjet pas lënies, rreziku për sëmundje zemre është i njëjtë me atë të një joduhanpirësi.
.
