Nën-drejtori i Përgjithshëm i ISHP-së, Dritan Ulqinaku ka zhvilluar një intervistë këtë të hënë për Fax News, ku ka analizuar situatën pandemike në vendin tonë, duke i dhënë përgjigje disa nga pyetjeve që mundojnë më shumë qytetarët.
I pyetur për një zgjatje të orarit të lëvizjes, epidemiologu Ulqinaku u shpreh se ai vetë është ‘partizan i hapjes totale’ dhe jo thjesht zgjatje të orarit të lëvizjes.
Një tjetër pyetje që i bëri moderatori Rezart Xhaxhiu ishte për një valë tjetër të mundshme Covid në verë. Ulqinaku u përgjigj me jo, duke shtuar se nuk beson që shifrat do të kalojnë përtej 0-100 në muajt në vijim.
Epidemiologu foli dhe për statistikat e vaksinave. Ai tha se janë bërë deri më tani 600 mijë vaksina, nga të cilat dy doza i kanë marrë mbi 100 mijë persona , ndërsa pjesa tjetër kanë marrë vetëm një dozë.
Duke folur për rrezikshmërinë e rritjes së shifrave si pasojë e ardhjes së turistëve të huaj nga vende me shifra të larta, Ulqinaku deklaroi se e vetmja filtër që mund të behet është vaksinimi i sa më shumë qytetarëve.
Intervista e plotë:
Parashikoni një valë tjetër në verë apo shtator? Jo, nuk parashikoj një valë tjetër. Pa diskutim që do të ketë ndonjë luhatje të vogël. Ky është një bisht, fundi i pandemisë. Paraashikojmë nga 0 në 100 për shumë ditë, por jo më shumë.
Rritje shifrash pas fushatës përse nuk ndodhi? Ishte një thirrje për të mos vazhduar atë rutinën e keqe që kishim, në mënyrë që të mos agravoheshim akoma më tepër. Klubet ishin plot, jeta ishte pothuajse në normalitetin e vet, pavarësisht se spitalet ishin plot. Kurba filloi një rënie në fillim të marsit dhe ne gjithmonë mendonim se grumbullimet në fushata mud te sillnin rritje.
A mund të hiqet maska pas vaksinës së dytë? Mendoj që kjo është një politikë qeveritare. Ideja është që nuk duhet të japim mesazhe të gabuara, sepse kemi akoma një numër të konsiderueshëm të popullatës të pavaksinuar, kemi akoma infeksion që qarkullon lirshëm. Mund të themi që është e parakohshme. Absolutisht që ata që janë vaksinuar dhe vaksina e ka bërë efektin e vet, është e padobishme mbajtja e maskës.
Pse nuk ka hyrë në Shqipëri Johnson & Johnson? Kjo është vaksina e fundit që doli në treg dhe pati probleme të njëjta me Astra Zeneca. Kjo është punë kontratash të qeverisë.
Nga 600 mijë doza, sa kanë marrë dy vaksina? Mbi 100 mijë kanë marrë dy doza, ndërsa pjesa tjetër janë me një dozë.
Si matet imuniteti i tufës? Ne përditë bëjmë mikrostudime. Që me ardhjen e vaksinës po bëjmë një studim masiv me OBSH, për efektet postvaksinale. Një numër i madh personash qe vaksinohen, intervistohen.
A do të ketë hapje graduale përtej orës 22:00? Unë jam partizan i hapjes totale. Nuk ka më sens që ne gjatë 18 orëve të jemi 100% të hapur dhe për orët e tjera të jemi të mbyllur. Kam thënë dhe më parë që duhet të jemi të ndërgjegjshëm.
Turistët nga vendet me shumë raste? E vetmja filtër është të vaksinojmë sa më shumë popullatën shqiptare. Prandaj duhet të vaksinojmë masivisht punonjësit e turizmit. Ky është i vetmi i filtër për të qenë të sinqertë, për të mos u bërë pre e vulgaritetit të sjelljes që ka egzistuar më parë.
(E.H/Faxweb.al)
loading…
/faxweb
