Cunami i prodhuesve kinezë të makinave në Evropë ka një qëllim të vetëm: të pushtojë të gjitha tregjet herët a vonë.
Panairi i Automobilave në Mynih nxori në pah një pikë kthese të madhe: Prodhuesit kinezë të makinave, nga BYD dhe SAIC deri te GAC që sapo ka lindur, tani janë të vendosur të pushtojnë Evropën.
Në një treg që dikur i trajtonte me skepticizëm, kinezët tani ata janë të sigurt: “Ne jemi këtu për të qëndruar”.
Presidenti i GAC International, Wei Haigang, zbuloi SUV-in elektrik Aion V, i cili do të dalë në shitje në Poloni, Portugali dhe Finlandë, me Aion UT që do të vijë në vitin 2026.
“Gjithçka fillon me nevojat e përdoruesit evropian”, theksoi ai, duke lënë të hapur mundësinë e prodhimit vendas.
Hongqi dhe Chery dërguan një mesazh të ngjashëm, duke përsëritur moton “në Evropë, për Evropën”, një frazë që të kujton moton kundërshtare të gjermanëve në Kinë.
Ironia është se ndërsa Grupi VW sheh shitjet e tij në Kinë të bien me 24% midis viteve 2020 dhe 2024, prodhuesit kinezë po ndërtojnë ura lidhëse në Evropë.
Sipas të dhënave nga JATO Dynamics, pjesa e tyre është pothuajse dyfishuar këtë vit, duke arritur në 4.8% midis janarit dhe korrikut.
McKinsey vlerëson se brenda një dekade, ata mund të arrijnë një pjesë të krahasueshme me atë të japonezëve (14%) dhe koreanëve (9%).
Sulmi nuk është rastësi. Praktikisht të izoluar nga Shtetet e Bashkuara, kinezët e shohin Evropën si një fushë beteje strategjike.
BYD njoftoi se fabrika e saj hungareze do të fillojë prodhimin në fund të vitit, ndërsa Xpeng hapi një qendër të re kërkimore në Mynih.
Hongqi premtoi 15 modele të reja deri në vitin 2028, duke e cilësuar praninë e saj në Evropë si një “angazhim të përjetshëm”.
Megjithatë, analistët paralajmërojnë: kinezët vazhdojnë të përshtasin kryesisht modelet ekzistuese me nevojat evropiane, pa krijuar produkte të projektuara nga e para për publikun evropian.
Shembulli i Yaris të vitit 1997 të Toyota-s është ilustrues. Siç vëren Pedro Pacheco i Gartner: “Sfida e vërtetë është ndërtimi i makinave me një shpirt evropian”.
E vetmja siguri? “Dragoi kinez” ka mbërritur në Evropë për të qëndruar, dhe beteja me gjigantët tradicionalë sapo ka filluar.