Skip to content

Jetlira do të largohej sot nga shtëpia, pas sherrit disa ditë më parë ajo kishte shkuar në polici

Ndajeni këtë artikull me të tjerë duke klikuar ikonat më poshtë

Subscribe

Një tjetër krim brenda familjes ka tronditur qytetin e Elbasanit. Jetlira Elezi, 37-vjeçe është masakruar me thikë nga bashkëjetuesi i saj Ramis Mici.

 

Personi që shikoni në foto është autori i vrasjes, i cili menjëherë pas krimit është larguar ndërkohë që është shpallur në kërkim nga policia.

 

Ngjarja e rëndë ka ndodhur në orët e para të mëngjesit brenda banesës me qira ku jetonte çifti, në lagjen “Skënderbej”. Ishin pronarët e banesës ata që e gjetën gruan pa jetë të mbuluar me gjak dhe lajmëruan autoritetet.

 

Vrasja dyshohet se ka ndodhur për motive xhelozie. Para pak kohësh çifti kishte probleme, ku e reja kishte denoncuar në polici Ramis Micin për dhunë. Më pas 37-vjeçarja ishte pajisur me urdhër mbrojtjeje.

 

Krimi rëndohet në kushtet kur viktima kishte kërkuar ndihmë nga policia, ndërkohë që uniformat blu vetëm e kishin shoqëruar autorin për dhunë në familje, por nuk e kishin arrestuar. Edhe me urdhër mbrojtje, ata jetonin në të njëjtën banesë deri sa gjendja e tyre është renduar duke sjellë vrasjen e Jetlira Elezit.

 

Një tjetër detaj që zbulohet është fakti se këtë të shtunë e reja do të ikte të jetonte në një banesë tjetër, pasi ndihej e frikësuar nga bashkëjetuesi dhe për faktin se ai ishte i lirë dhe jetonin në të njëjtin ambient. Por duket se kjo e ka acaruar 37-vjeçarin i cili ka marrë thikë dhe e ka lënë të vdekur.

 

Të dy bashkëjetuesit vinin nga martesa të mëparshme dhe ishin të divorcuar. Viktima ishte nëna e dy fëmijëve, gjithashtu dhe autori kishte dy fëmijë nga martesa e parë. Fatmirësisht viktima e cila mbante vajzën nga martesa e parë, para pak ditësh e kishte dërguar tek ish-bashkëshorti dhe e mitura nuk ka qenë e pranishme në momentin që njerku i vrau të ëmën.

Ndajeni këtë artikull me të tjerë duke klikuar ikonat më poshtë