Demokratët shohin tek vendimi i Gjermanisë për hapjen e negociatave me kushte, skanimin më të saktë të realitetit dhe problematikës në Shqipëri. Anëtarja e kryesisë Jorida Tabaku shpjegon se për herë të parë procesi i negociatave është ndarë në dy faza, dhe faza e parë detyron Shqipërinë që sa më shpejt të ngrejë gjykatën kushtetuese e atë të lartë si dhe të miratojë reformën zgjedhore.
Jorida Tabaku: “Ato na kërkojnë që të zgjidhim këto dy probleme së pari, përpara se të vendoset një datë për konferencën e parë ndërqeveritare. Dhe vetëm pasi janë ezauruar këto të dyja, pas konferencës së parë ndërqeveritare ku Maqedonia do të vazhdojë me çeljen e kapitujve, Shqipëria ka 7 kushte të tjera dhe pasi të plotësohen këto 7 kushte atëherë do të kemi mundësinë që të vendosim një datë për hapjen e dy kapitujve 23 dhe 24”.
7 kushtet përfshijnë nga përcaktimi i ligjshmërisë së zgjedhjeve të 30 qershorit deri tek gjykimi i atyre që akuzohen për blerje votash, duke vazhduar më tëj me funksionimin e SPAK-ut e hetimin e magjistratëve që janë rrëzuar në veting; një panoramë kjo që për demokratët tregon se qeveria është përgjegjësja e vetme për vonesat në rrugën e integrimit.
“Çdo vendim dhe çdo hap i cili është i përmendur në mocionin e Bundestagut është vetëm në dorë të qeverisë për tu bërë. Nuk e kanë bërë në 6 vite, është mungesa e vullnetit politik, ashtu siç është mungesa e vullnetit politik për zgjedhjet, për situatën ekonomike, sociale, për kapjen e shtetit; për mungesën e gjykatës kushtetuese.”
Nga ana e saj, opozita e ka hedhur tashmë hapin e parë duke u bërë pjesë e procesit të reformimit të kuadrit ligjor për zgjedhjet
“E sigurt është që nuk ka reformë zgjedhore pa PD dhe pa opozitën. E sigurt është që ashtu siç thotë raporti i OSBE-ODIHR, ashtu siç thotë mocioni i Bundestagut gjerman, të gjitha palët politike dhe forcat politike, dhe partitë politike dhe kjo është më e rëndësishme, ato parti politike që përfaqësojnë vullnetin e qytetarëve duhet të jenë ato që duhet të vendosin për këtë reformë”.
Tashmë që gjermania e tha fjalën e saj, mbetet për tu parë qëndrimi i Francës për të kuptuar nëse ne 18 tetor Shqipëria do ti hapë negociatat për anëtarësim në Bashkimin Europian.
