Me specialistin e bimëve mjekësore Ylli Merja, flasim për rënien e flokëve në vjeshtë, si të kuptojmë që është sezonale dhe si ta parandalojmë përmes metodave natyrale.
Në rubrikën “Bima dhe Shëndeti” në emisionin e mëngjesit “Rreze Dielli” në Report Tv me specialistin e bimëve mjekësore Ylli Merja folëm për rënien e flokëve në vjeshtë, si të kuptojmë që është sezonale dhe si ta parandalojmë përmes metodave natyrale.
Humbja e flokëve është një dukuri normale dhe përgjithësisht ndodh gjatë ndërrimit të stinëve, sidomos në vjeshtë. Në fakt sipas specialistit Merja, dobësimi dhe dëmtimi i flokëve fillon që në stinën e verës duke rezultuar më pas me rënien e tyre në vjeshtë. Shkaktarët e rënies së flokëve janë të shumtë si:
- Qëndrimi në diell në orarin 11.00 -15.00, pasi rrezatimi UVB dëmton skalpin dhe dobëson flokun
- Trashëgimia familjare (më tepër tek meshkujt)
- Konsumi i sheqerit të tepërt. Glukoza e rritur shoqërohet me çlirimin e hormonit androgjen, i cili redukton folikulat
- Konsumi i proteinave në nivele të ulta (tendenca për të mos konsumuar proteina për rënie në peshë)
- Njerëzit anemik si pasojë e mungesave të elementeve Hekur, Zink, Kalcium, etj, dobëson fibrat dhe folikulat e flokut
- Rritja e ndjeshmërisë nervore në disa zona të caktuara të skalpit të kokës (tkurren folikulat, ngjeshen dhe shkulet fija)
- Ulja e cistinës, aminoacidi që zhvillon përbërësin proteinik të flokut
- Teprica ose mungesa e vitaminës A
- Çrregullimi hormonal, hormoni e tiroides
- Infeksionet e shpeshta të streptokokëve në skalpin e kokës, në vesh, në grykë, hundë, etj
- Stresi fizik dhe psikik dhe çrregullimet hormonale
- Duhanpirja, trashja e gjakut
Për trajtimin dhe parandalimin e rënies së flokëve së pari duhet të njohim shkaktarët. Sigurisht, specialisti Merja thekson se ka një kurë kryesore bimësh për shëndoshjen e rrënjës së flokut dhe më pas kësaj kure mund t’i bëhen shtesa në bazë të problematikës që ka shkaktuar rënien e flokëve.
Produktet që forcojnë rrënjën e flokut janë:
- Bima që zgjon folikulën – shkurrja e Flomit ose zgjomi (euphorbia dendroides)
- Kombinimi i qepës dhe hudhrës – të shtypura vendosen mbi skalpin e kokës 10-15 minuta
- Përdorimi i brokolit, specit rrisin cistinën
- Fara kungullit dhe arroret forcojnë dhe trashin flokun pasi përmbajnë hekur, zink, kalcium, vitaminë D
- Patatja e kuqe, karrota pasi përmbajnë vitaminë A dhe betakarroten
- Rozmarina, dafina, sherebela, arra – forcojnë flokun, rregullojnë hormonet
- Vaj kokosi, vaj arre, vaj liri
Ndërsa për personat, sidomos meshkujt që kanë një rënie më të theksuar dhe më të shpeshtë, Merja rekomandoi një kurë disa javore për mbirjen e flokëve në mënyrë natyrale. Së pari ekzaminohet floku me mikroskop që nga rrënja deri tek maja, shikohen folikulat nën skalp dhe pastërtia e skalpit (nëse ka infeksion). Më pas fillon mjekimi:
- Pas larjes së kokës vendosim maskë me qepë dhe hudhër të shtypur mbi skalp për 10-15 minuta. Heqim maskën dhe pa e larë flokun vendosim një ekstrakt floku me hudhër dhe bimë qumështore. Lihet 24 orë. Kjo bëhet 3 ditë rresht çdo darkë.
- Dita e katërt e në vazhdim: Pihen 3 x 1 gotë në ditë çaj për forcimin e rrënjës së flokut. Mund të shtojmë në çaj përbërës për sëmundjen konkrete. Spërkasim skalpin e kokës ose me ekstrakt floku ose maskë floku. Kjo bëhet 4-5 herë në javë (vazhdon 3-4 javë).
- Pas 3-4 javëve shikojmë flokun të mbirë. Nëse janë të hollë ose të zbardhur, floku pastrohet me brisk. Pas kësaj, mjekimi përsëri fillon si në ditën e parë: 3 ditë me ekstrakt hudhre të fortë dhe qumështor, ditët e tjera me çajin, ekstraktin ose maskën. Floku nxihet dhe trashet.
Në fund të bisedës specialisti i bimëve mjekësore Ylli Merja sugjeroi dhe disa çajra në formë maske për të pasur flokë të shëndetshëm, për flokë të yndyrshëm dhe për probleme me skalpin e kokës.
- Në një litër ujë zieni 2-3 minuta 1 dorë hudhra, 4-5 degëza rozmarinë dhe 1 lugë livando. Me çajin lani flokun, në të cilin mund të shtoni 1 lugë supe uthull molle.
- Për flokë të yndyrshëm: Në 1 litër ujë zieni 2-3 minuta 3 lugë mollë të egra, 3 degë rozmarinë, 1 dorë petale trëndafili ose kamomil.
- Për infeksione, stafilokoku ose myku: Në 1 litër ujë zieni 2-3 minuta 2 lugë gjelle rigon, 2-3 degë rozmarinë, 1 dorë sherebel. Shpëlani kokën 1 herë në ditë.
Burimi: shqiptarja.com