Është kënaqësi të shohësh burra e gra në moshë të thyer që nuk e kanë humbur dëshirën për punë, e veçanërisht kur gjen raste si ai i këtij 80 vjeçari, që kryen një zanat që në Shqipëri është thuajse i zhdukur.
Ky është Mehmet Alla nga Kuturmani i Librazhdit. Jetën ia ka kushtuar mbledhjes e përpunimit të lëkurave. Me këtë zanat merret qëkur ka qenë 16 vjeç dhe e vazhdon ende sot e kësaj dite.
Abc i ka kushtuar një kronikë këtij zanatçiu, i cili tregon se rrugën nga fshati i tij deri në qytet e ka bërë në këmbë për 40 vite të jetës së tij. Nga punëtor i thjeshtë që përpunonte leshin, më tutje është marrë me përpunimin e lëkurës së bagëtive.
Pas vitit ’90 vendosi të jetojë në Librazhd dhe që nga ajo kohë punon e furnizon një fabrikë në Berat. 80 vjeçari tregoi disa nga ‘sekretet’ e punës së tij.
“Në verë duhen kriposur për dy orë se krimben ka procedurë, me e pastruar me heq mbeturinat e tjera. Në verë vij dhe natën në punë, sepse zanati do shumë kujdes. Qengjat i përdorin për gëzofin, kurse viçi përdoret për këpucët… shkon në Itali”-tregon i moshuari.
Një prej miqve të Mehmetit, Ali Çota, ka disa fjalë me vend për bashkëpunëtorin e tij të kahershëm e madje dhe një mesazh për të rinjtë e sotëm.
“Duhet të jetë shembull për të gjithë, sidomos për rinjtë. Ka të rinj që vijnë vërdallë e ankohen se nuk ka punë. Por kur njeriu ka vullnet, kur ka kurajo, punën e gjet vetë. Se kur i thonë shprehjes, njeriu ka jetuar aq sa ka punuar. Jeta matet me vite punë jo me vite gjumë,” shprehet ai.
