Presidenti i Asamblesë së Madhe Kombëtare të Turqisë, Mustafa Sentop, deklaroi se çështja e Jeruzalemit është çështja më e rëndësishme dhe kryesore e shekullit 21.
Sentop foli në ceremoninë e hapjes së ndërtesës së Platformës Ndërparlamentare të Jeruzalemit në Stamboll, e kjo me rastin e 29 nëntorit, Ditës Ndërkombëtare të Solidaritetit me Popullin Palestinez.
Ai vuri në dukje se Asambleja e Përgjithshme e KB shpalli 29 nëntorin Ditën Ndërkombëtare të Solidaritetit me Popullin Palestinez.
“Shpresoj që kjo qendër të jetë një vend për bisedime dhe takime të rëndësishme mbi çështjet e Palestinës dhe Jeruzalemit,” tha Sentop.
Ai nënvizoi se çështja e Jeruzalemit nuk është çështje vetëm e palestinezëve, arabëve dhe botës islamike.
“Në fakt, kjo është një çështje e të gjithë njerëzve që besojnë në drejtësi, pavarësisht nga raca, feja ose përkatësia politike. Në këtë kuptim, është shumë e rëndësishme të vazhdojmë luftën për këtë qëllim. Platforma Ndër-Parlamentare e Jeruzalemit përfshin më shumë se 1,500 parlamentarë nga 73 vende….E gjithë bota po lufton krah për krah”, tha Sentop.
Ai nënvizoi se çështja e Palestinës dhe Jeruzalemit është “çështja më e rëndësishme dhe thelbësore e shekullit 21” dhe shtoi:
“Fjala kyçe e rendit botëror të shekullit 21 është Jeruzalemi, fjala tjetër kryesore është Palestina. Të ndjekësh çështjen e Jeruzalemit dhe Palestinës, të luftosh për të, do të thotë të diskutosh për rendin botëror të vendosur pas dy luftërave botërore të shekullit 20”.
