Artisti Robert Aliaj, i ftuar në studion e emisionit “Kjo Javë” në News24, ka bërë një thirrje të fortë drejtuar shoqërisë shqiptare dhe komunitetit të artistëve për t’u bërë pjesë e protestës qytetare që po zhvillohet në kryeqytet.
Aliaj u shpreh se kjo është një betejë ku çdo familjar duhet të ndjejë përgjegjësi për të ardhmen, por nga ana tjetër ndau një alarm të madh lidhur me prapaskenat e politikës. Ai paralajmëroi se dy partitë e mëdha, Partia Socialiste dhe Partia Demokratike, do të tentojnë me të gjitha mënyrat ta sabotojnë dhe ta përçajnë këtë lëvizje organike, ashtu siç bënë disa vite më parë.
Aliaj shprehu skepticizmin e tij mbi fatin e lëvizjes nëse qytetarët lejojnë që partitë politike të fusin duart në kauzën e tyre, duke kujtuar skenarin e hidhur të kaluarës.
“Të gjithë prindërit duhet të dalin në shesh, nëse mendojnë se kjo situatë mund të ndryshohet. Por kam shumë frikë se do e përçajnë protestën. Ndodhi me protestën e studentëve në vitin 2018, kur PS dhe PD u përfshinë dhe e përçanë me mënyrat e tyre,” deklaroi Aliaj përballë gazetares Nisida Tufa.
Më tej, Aliaj nuk i kurseu kritikat as për botën e artit në Shqipëri, duke u kujtuar artistëve se nuk mund të qëndrojnë indiferentë apo të fshihen përballë shqetësimeve të publikut që i ka ngritur në piedestal.
“Edhe artistët kanë një detyrim, sepse ka kosto të jesh artist. Fama e tyre ushqehet nga këta njerëz, prandaj artistët në Shqipëri duhet të jenë bashkë me njerëzit në shesh,” përfundoi Aliaj.
