Deputetja demokrate, Dhurata Çupi ka komentuar aksionin opozitar në Kuvend gjatë seancës së fundit plenare ku deputetët ndezën flakadanë, ndërsa shprehet se një situatë e tillë do të vijojë deri në “ditën që mazhoranca vendos të respektojë Kushtetutën dhe Rregulloren e Kuvendit”.
Në një reagim në rrjetet sociale, deputetja Çupi thekson se funksioni legjislativ dhe mbikëqyrës i Parlamentit garantohet nëpërmjet ngritjes së komisioneve hetimore parlamentare, dhe respektimi i të drejtave kushtetuese të opozitës.
Sipas saj, kërkesat e opozitës janë të qarta dhe në harmoni me reagimet e ndërkombëtarëve.
Reagimi i plotë
Funksioni legjislativ dhe mbikëqyrës i Parlamentit garantohet nëpërmjet ngritjes së komisioneve hetimore parlamentare, kostituimit dhe fillimit të punës së komisionit të posaçëm të reformës zgjedhore dhe respektimi i të drejtave kushtetuese të opozitës.
Kërkesat tona janë të qarta dhe në harmoni me reagimet e miqve tanë ndërkombëtarë. Ditën që mazhoranca vendos të respektojë Kushtetutën dhe Rregulloren e Kuvendit, jeta parlamentare i rikthehet normalitetit.