Shtetet në të gjithë Europën jane duke i shtuar përsëri kufizime në jetën publike, pasi një rritje e infeksioneve nga koronavirus ka shtuar frikën se pandemia po rikthehet me forcë, duke sjellë një tjetër urgjencë të shëndetit publik, me afrimin e dimrit, shkruan Financial Times.

Në Gjermani, Republikën Çeke dhe Poloni, infeksionet arritën rekorde ditore të enjten ndërsa Franca vendosi kufizimet e mbrëmjes në qytetet e saj më të mëdha dhe londinezët përballen me kufizime të reja në grupimet në ambientet e brendshme.

“Rilindja” e virusit është një pengesë e madhe për një kontinent që kishte arritur të ule infeksionin në nivele të menaxhueshme gjatë verës, pas zbatimit të masave të ashpra bllokuese.

“Pjesë të Europës kanë humbur kontrollin,” tha Jonas Schmidt-Chanasit, një virolog në Institutin Bernhard Nocht në Hamburg. “Autoritetet nuk janë më në gjendje të ndikojnë në përhapjen e virusit.”

Gjermania, e cila deri më tani e ka tejkaluar pandeminë më mirë se fqinjët e saj, njoftoi 7,334 raste të reja të premten – një rekord i ri. “Sfida vendimtare me të cilën përballemi – jo vetëm në Gjermani por në të gjithë Europën – është nëse mund të kufizojmë dinamikën e valës së dytë dhe të arrijmë në një situatë më të qetë “, tha Peter Altmaier, ministër i ekonomisë.

Mbretëria e Bashkuar, Franca, Holanda, Spanja, Portugalia dhe Republika Çeke kanë zbatuar kufizime e reja të lidhura me virusin këtë javë.

Sistemet shëndetësore përreth kontinentit po kalojnë në gjendje emergjence, ndërsa pavijonet spitalore fillojnë të mbushen me pacientë me Covid-19. Frika po rritet se spitalet mund të mbingarkohen dhe ekipet gjurmuese do të jenë të detyruara të ndërpresin zinxhirët e transmetimit të virusit.

Kreu i zyrës për Europën i Organizatës Botërore të Shëndetësisë i mirëpriti masat, duke i quajtur ato “absolutisht të nevojshme” për të shpëtuar jetë.

Rastet e viruseve filluan të rriten pasi qeveritë evropiane lehtësuan bllokimet gjatë verës për të nxitur ekonomitë që ishin goditur rëndë nga kufizimet. Por ekspertët e shëndetit publik thonë se evropianët kishin ulur vëmendjen, duke pushuar në grupe, duke injoruar rregullat e distancimit shoqëror dhe duke u mbledhur në grupe për të ngrënë, pirë dhe shoqëruar.

Në javën deri nmë 11 tetor, Europa regjistroi numrin e saj më të lartë javor të infeksioneve Covid-19 që nga fillimi i pandemisë, me pothuajse 700,000 raste të reja, sipas statistikave të OBSH-së.

Qeveritë deri më tani kanë qëndruar larg nga masat drakoniane të tilla si mbyllja e shkollave ose rivendosja e ndërprerjeve në të gjithë vendin, nga frika e shkaktimit të dëmeve të mëtejshme në ekonomitë që ende përpiqen të dalin nga recesioni.

Ata në vend të kësaj kanë urdhëruar kufizimet në orare, mbylljen e lokaleve dhe bareve dhe ndalimin e tubimeve shoqërore. Por mbetet e paqartë nëse masa të tilla të kufizuara do të jenë të mjaftueshme për të rrafshuar kurbën aktuale.

Disa nga masat më drastike u miratuan nga Franca, ku qeveria vendosi përsëri një gjendje të jashtëzakonshme të mërkurën dhe Presidenti Emmanuel Macron njoftoi një shtetrrethim nga ora 21:00 – 6:00 e mëngjesit për Parisin dhe tetë qytete të tjera të mëdha nga e shtuna.

Kjo ishte një përgjigje ndaj një rritjeje të qëndrueshme të numrit të infeksioneve dhe shtrimeve në spital në Francë gjatë javëve të fundit. “Repartet tona të kujdesit intensiv janë nën presion të paqëndrueshëm,” tha z. Macron.

Në Spanjë, ku infeksionet u rritën në mënyrë dramatike në gusht dhe shtator, një numër rajonesh përfshirë Katalonjën kanë vendosur kufizime të reja.

Autoritetet gjermane këtë javë hapën rrugën për masa më të ashpra që do të vendosen për të frenuar virusin. Kjo do të lejojë qeverinë të kërkojë vënien e maskave në publik, të kufizojë numrin e të ftuarve në festa private dhe mbylljen e hershme të restoranteve dhe bareve./Monitor

Subscribe kanalin tonë në Youtube për të mos humbur asnjë video të re