Rregullat dhe ligjet janë të detyrueshme për t’u zbatuar nga të
gjithë, si për qytetarët ashtu edhe për autoritetet. Por një foto e
dërguar në rubrikën “Kallëzo” pranë redaksisë së tvklan.al, ngre disa pikëpyetje.
Tre motora, dy prej të cilëve në shkelje të rregullave të
qarkullimit rrugor. Njëri nga të dy, i përket Policisë Rrugore, me të cilin po
udhëtojnë dy punonjës policie. Kjo foto është shkrepur në rrugën “Myslym
Shyri” në kryeqytet. Drejtuesi i parë ka zbatuar me përpikmëri rregullat e
qarkullimit, pasi ka vendosur kaskën mbrojtëse.
I dyti është motori i policisë, ku shihet që polici pasagjer është i
pa pajisur me kokoren sikurse e kërkon ligji. E njëjta pamje edhe në
motorin e tretë, ku drejtuesi ka vendosur kaskën kurse pasagjeri jo.
Sipas nenit 160 të Kodit Rrugor, drejtuesit dhe pasagjerët e motorave e kanë të detyrueshme përdorimin e kaskës mbrojtëse.
NENI 169 – PËRDORIMI I KASKËS MBROJTËSE PËR PËRDORUESIT E MJETEVE ME DY RROTA:
1. Eshtë e detyrueshme që gjatë lëvizjes të vihet në kokë një
kaskë mbrojtëse sipas tipit të homologuar, në përputhje me normativat e
përcaktuara nga ministria që mbulon veprimtarinë përkatëse për:
a) drejtuesit e çiklomotorëve dhe motorëve me dy rrota;
b) drejtuesit e motorëve të çfarëdo cilindrate, edhe po të jenë
të pajisur me kosh, si dhe për pasagjerët edhe po të jenë në moshë jo
madhore.
2. Cilido që shkel dispozitat e këtij neni, ndëshkohet me masë
administrative me gjobë nga dyqind e pesëdhjetë deri në një mijë lekë.
Kur shkeljen e kryen një pasagjer në moshë jo madhore, përgjegjësinë e
mban drejtuesi i mjetit.
Por kjo është një situatë që e has shpesh në realitetin shqiptar, ku
ata që duhet të jenë të parët në zbatimin e ligjit, shpesh i shpërfillin
vetë këto rregulla. Sa paradoksale dhe e ndershme do të ishte nëse kjo
patrullë e policisë rrugore do të gjobiste dy të rinjtë me motor për
mosvendosjen e kaskës mbrojtëse në rastin e pasagjerit? Përgjigjen po iu
a lëmë juve. /tvklan.al