Për shkak të ndalesës së kampionatit në Kategorinë Superiore dhe të Parë e gjithë vëmendja e fundjavës në futbollin shqiptar ishte fokusuar në Kategorinë e Dytë.
Në fushë zbritën edhe dy skuadrat e qarkut tonë. Skrapari dhe Naftëtari, të cilat i kanë mbyllur me humbje të dy ndeshjet e tyre.
Naftëtari kishte një përballje të vështirë në transfertë me Devollin kandidat për tu ngjitur një kategori më lart. Pas pjesës së parë të mbyllur në barazim pa gola bilishtarët e vendosin ndeshjen në të dytën.
Skuadra e drejtuar nga Stavri Nica e gjeti dy herë golin në fraksionin e dytë. Fillimisht është Xhaka që i jep avantazhin ndërsa Kame dyfishon nga pika e bardhë. Pavarsisht humbjes kuçovarët ruajnë distancën me tre pikë nga vendi i fundit.
Në transfertë luante edhe Skrapari përballë Tepelenës. Edhe skrapalinjtë e kanë humbur sfidën e tyre dhe janë arritur nga tepelenasit në klasifikim. Edhe këtu është një 11 metërsh që vendos ndeshjen por që në fraksionin e parë të lojës.
Në fundin e ndeshjes Skrapari e mbyll me 10 futbollistë pas daljes me kartonin e kuq të Haxhiut në minutën e 91’.
Xhafa ka goditur saktë nga pika e bardhë duke i dhënë fitoren vendasve dhe kështu Skrapari mbetet i teti me 20 pikë./Berati.TV
Kategoria e Dytë, java e 18të
Devolli 2-0 Naftëtari
Shënues: Xhaka 54’, Kame 72’ (pen)
Tepelena 1-0 Skrapari
Shënues: Xhafa 29’ (pen)