Edhe në ditën e gjashtë të kërkimeve për dy policët e zhdukur nga Kaçaniku, qindra persona po marrin pjesë në kërkim që po bëhet në lumin Lepenc, por ajo që bie në sy në mesin e gjithëve është një grua rreth të dyzetave e cila mbante shtrëngueshëm një shufër të gjatë hekuri duke kontrolluar çdo pëllëmbë të lumit.
Kjo është Makbule Bela nga Hani i Elezit e cila për të pesten ditë me radhë në mënyrë vullnetare për çka tregon arsyen.
“Këtë po e baj n’mënyrë vullnetare se kjo mundet me i ndodhë çdokujt dhe gjithsecili e ka për obligim me e ndihmu njani-tjetrin mirëpo unë edhe i kam njoftë te dy ata djem se kam lidhje familjare me ta e janë shumë djem t’mirë, është gjynah çka ju ka ndodhë”, thotë Makbulja.
Ajo mëtej shton se ka ardhur nga Holanda dhe i është bashkangjitur luftës së UÇK-së në zonën operative të Pashtrikut, konkretisht ka qenë pjesëmarrëse në Betejën e Kosharës. Ajo thotë se e ka pasur komandant në atë kohë Rrustem Berishën, tash ministër i FSK-së ministri e cila po udhëheq me operacionet e kërkim-shpëtimit në përpjekje për gjetjen e policëve Armend Trena e Malësor Dashi.
“Unë tash me punu s’punoj kërkun jetoj më një pension 170 euro që e marr nga shteti si veterane e luftës, shteti nuk m’ka gjet naj punë e jam met qeshtu niher po kontriboj në mënyrë vullnetare naj sen çka po kam mundësi. Unë e kam pasë një rast të tillë në familje prandaj jam shumë e ndjeshme… ”, thotë me zë të ulët Magbulja, teksa tregon se para disa viteve i është mbytur në ujë vajza e vllaut dy vjeçare.
Kujtojmë se as pas gjashtë ditësh kërkimesh ende nuk ka gjurmë të dy policëve të zhdukur.