Këshilli i Ambasadorëve Shqiptarë, ka zhvilluar seminarin e dytë mbi Dialogun me Organizatat e Shoqërisë Civile për Ndryshim në Ballkanin Perëndimor, në Shqipëri.
Gjatë këtij takimi, Këshilli ka ofruar për OJF-të mjetet dhe aftësitë diplomatike të nevojshme për t’u angazhuar në mënyrë efikase me qeveritë, organizatat ndërkombëtare, ambasadat, përfaqësuesit e huaj dhe mediat, për t’i ndihmuar ata në adresimin e sfidave.
Ky takim ka shërbyer ndër të tjera dhe për të theksuar se Ballkani Perëndimor ka shumë më tepër vlera që i bashkon, sesa i ndan.
“Duke u mbështetur në arritjet e seminarit të mëparshme në Shkup, ai Golemit ripohoi, një të vërtetë thelbësore: Ballkani Perëndimor ka shumë më tepër vlera që na bashkojnë sesa na ndajnë”, thuhet në deklaratën e Këshillit të Ambasadorëve Shqiptarë.
Këshilli njofton po ashtu se ky seminar ka ndihmuar në adresimin e sfidave dhe arritjen e objektivave të shoqërisë civile për zhvillimin e rajonit.
Deklarata e plotë
Këshilli i Ambasadorëve Shqiptarë është krenar për suksesin e seminarit të dytë mbi Dialogun me Organizatat e Shoqërisë Civile për Ndryshim në Ballkanin Perëndimor, i mbajtur në qytetin e bukur bregdetar të Golemit, Shqipëri.
Duke përdorur përvojën e tij të gjerë, Këshilli i Ambasadorëve Shqiptarë u ka ofruar organizatave të shoqërisë civile mënyrat, mjetet dhe aftësitë e duhura diplomatike për t’u angazhuar në mënyrë efektive me qeveritë, Organizatat Ndërkombëtare, ambasadat dhe përfaqësuesit e huaj, mediat, etj, për t’i ndihmuar ata në adresimin e sfidave me të cilat po përballen dhe në arritjen e objektivave të tyre.
Kjo ngjarje shënoi një tjetër hap të rëndësishëm përpara në forcimin e bashkëpunimit rajonal, angazhimin qytetar dhe aspiratat e përbashkëta për një Ballkan Perëndimor më gjithëpërfshirës dhe më të begatë.
Duke u mbështetur në arritjet e seminarit të mëparshme në Shkup, ai Golemit ripohoi, një të vërtetë thelbësore: Ballkani Perëndimor ka shumë më tepër vlera që na bashkojnë sesa na ndajnë.
Historia, vlerat dhe aspiratat tona të përbashkëta shërbejnë si një bazë e fuqishme për bashkëpunim. Nëpërmjet dialogut të hapur dhe partneritetit, ne mund të adresojmë më së miri sfidat e përbashkëta dhe të nxisim përparim domethënës në rajon.
Ky seminar ofroi një platformë të vlefshme për thellimin e kontaktateve, shkëmbimin e ideve dhe gjetjen e zgjidhjeve praktike për të forcuar rolin e shoqërisë civile në formësimin e së ardhmes së rajonit tonë. Angazhimi aktiv i pjesëmarrësve dhe larmia e diskutimeve riafirmoi rolin jetik të organizatave të shoqërisë civile në nxitjen e stabilitetit, vlerave demokratike dhe bashkëpunimit rajonal.
Ne shprehim vlerësimin dhe falenderimet tona të sinqerta për Fondin e Ballkanit Perëndimor dhe Bashkimin Evropian për mbështetjen e tyre të vazhdueshme, si dhe për të gjithë pjesëmarrësit, përkushtimi dhe përvoja e të cilëve kontribuan në suksesin e kësaj nisme.
Këshilli i Ambasadorëve Shqiptarë mbetet i përkushtuar për të nxitur dialogun, bashkëpunimin dhe integrimin evropian për Ballkanin Perëndimor. Ne shpresojmë të punojmë së bashku drejt një të ardhmeje ku rajoni ynë zhvillohet me stabilitet dhe begati.
