Qeveria shqiptare ka zgjatur me një vit afatin e qëndrimit në Shqipëri të shtetasve ukrainas që u larguan nga vendi i tyre për shkak të luftës.
Vendimi është marrë ditën e sotme në mbledhjen e këshillit të ministrave. Në vendim thuhet se afati zgjatet nga 1, në 2 vite.
Për zbatimin e tij janë ngarkuar Ministria e Brendshme dhe Ministria për Evropën dhe Punët e Jashtme.
Vendimi i qeverisë
Në mbështetje të nenit 100 të Kushtetutës dhe të pikës 2, të nenit 29, të ligjit nr.79/2021, “Për të huajt”, me propozimin e ministrit të Brendshëm dhe të ministrit për Evropën dhe Punët e Jashtme, Këshilli i Ministrave
V E N D O S I:
- Në pikën 1, të vendimit nr.169, datë 18.3.2022, të Këshillit të Ministrave, “Për përcaktimin e afatit të hyrjes dhe qëndrimit të shtetasve të Ukrainës në Republikën e Shqipërisë”, togfjalëshi “… 1 (një) vit …” zëvendësohet me “… 2 (dy) vjet …”.
- Ngarkohen Ministria e Brendshme dhe Ministria për Evropën dhe Punët e Jashtme për zbatimin e këtij vendimi.
Ky vendim hyn në fuqi pas botimit në “Fletoren zyrtare”.