Udhëheqësi suprem fetar i Iranit, Ayatollah Ali Khamenei, tha të shtunën se ish-presidenti amerikan Donald Trump, i cili urdhëroi vrasjen e gjeneralit iranian Qassam Soleimani, do të harrohet në koshin e plehrave të historisë pasi të paguajë çmimin për vrasjet e kryera në mbarë botën.
Soleimani, një ish-komandant i detashmentit elitar të Gardës Revolucionare iraniane u vra në sulmin ajror amerikan më 3 janar 2019, pranë Bagdadit.
Në prag të përvjetorit të dytë të vrasjes, Khamenei u takua me familjen e Soleimanit.
Me atë rast ai tha se Soleimani u bë model për të rinjtë në rajon.
“Vrasësit e Qassam Soleimanit, duke përfshirë Trump dhe të tjerët si ai, do të harrohen në koshin e plehrave të historisë pasi të paguajnë çmimin për vrasjet e kryera në mbarë botën,” tha Khamenei.
Ai tha gjithashtu se Shtetet e Bashkuara kishin ikur nga Afganistani dhe po kryenin stërvitje ushtarake në Irak dhe u bëri thirrje autoriteteve dhe njerëzve irakianë që të mendojnë me kujdes për këtë.
“Fronti i rezistencës po përparon në Jemen. Armiku nuk shpreson për një të ardhme as në Siri. Frontet e rezistencës në të gjithë rajonin kanë gjithnjë e më shumë shpresë,” tha Ajatollah Khamenei.
