Ish-kryeministri Sali Berisha, ka reaguar pas ngjarjeve kriminale që tronditen vendin ditët e fundit, ku kanë humbur jetën disa persona.
“Javë lufte” i ka cilësuar Berisha këto ditë, ndërsa shprehet se ne vendin tonë është raportuar për të vrarë, të plagosur, të vetëvrarë më shumë se në të gjithë Europën të marrë së bashku, përveç frontit të Ukrainës.
“Në çdo kënd të këtij vendi, krimi zotëron, bën ligjin, kontrollon rendin dhe ka në duar rendin”, u shpreh ai para mbështetësve të tij nga ballkoni i banesës.
Pjesë nga fjala e Berishës
Të dashur miq, kjo javë ishte një javë lufte. Një javë sikur Shqipëria të ishte një zonë lufte. Të vrarë, të plagosur, të vetëvrarë më shumë se në të gjithë Europën të marrë së bashku përveç frontit të Ukrainës. Dje, në mes të rrugëve, në mes të ditës, në rrugët më kryesore shkrehen bateri plumbash.
Mbrëmë ekzekutohen në Velipojë dy vëllezër. Kryeplaku i një fshati në Memaliaj gjendet i therur me thikë në një përrua të Zhapokikës.
Në çdo kënd të këtij vendi, krimi zotëron, bën ligjin, kontrollon rendin dhe ka në duar rendin. Të dashur miq, krimi, vrasjet, trafiqet, grabitjet janë sot kërcënim madhor për jetën e çdo shqiptari.
Dhe çdo ditë, çdo javë ato do bëhen më të rrezikshme. Aleanca e qelbësirave që u krijua në vitin 2013 kundër rendit demokratik nga Edi Rama është shndërruar sot në aleancë krimi, droge, trafiqesh, vrasjesh, vjedhjesh të shqiptarëve.
Ishte ajo aleancë në moton ‘qelbësira të të gjithë vendit bashkohuni kundër Sali Berishës’ që sot shprehet me sundimin e krimit shtetëror. Me dominimin e krimit mbi parlamentit, mbi qeverinë, mbi drejtësinë, mbi policinë, mbi të gjitha institucionet.