Në ditën ndërkombëtare të Turizmit, Bashkia e Klosit ka zgjedhur Urën e Vashës për ta priomovuar. Një grup nxënësish nga shkolla 9-vjeçare “Tahir Hoxha” Klos, iu bashkuan përfaqësuesve të bashkisë për të vizituar Urën e Vashës, një vepër me rëndësi historike dhe arkitekturore. Mësuesja e lëndës së historisë Ishe Barhani tha se trashëgimia jonë historike-kulturore duhet të përcillet edhe tek brezi i ri.
Edhe pse kjo vepër e rrallë që mban statusin edhe monument kulture gjendet shumë pranë Klosit, në të mungojnë investimet. Kryetari i Bashkisë Klos, Basir Çupa tha se me ndërtimin e rrugës së arbrit, ajo është më pranë qytetarëve, pasi ka një distancë me të jo më shumë se 200 metra. Çupa kërkoi mbështetjen e Ministrisë së Kulturës dhe asaj të turizmit në mënyrë që këto atraksione të rëndësishme turistike, të kenë infrastrukturën e duhur dhe të jenë në shërbim të vizitorëve:
Megjithëse nuk ekziston një dokument i saktë, Ura e Vashës mendohet të jetë ndërtuar tre shekuj më parë dhe ajo ka shërbyer për Maqedoninë dhe Dibrën për të lëvizur drejt Tiranës.
