Vështirësitë që ekzistojnë në front i pranoi edhe kreu i ushtrisë ukrainase Oleksandr Shirsky i cili ishte në vijën e frontit në lindje.
“Forcat ukrainase kanë larguar trupat ruse nga fshati Orlivka, në perëndim të Avdiivka, por situata në frontin lindor mbetet e vështirë”, tha ai.
Orlivka ndodhet më pak se dy kilometra në veriperëndim të Lastotskyne, e cila u kap së fundmi nga forcat ruse. Forcat ruse javën e kaluar pushtuan qytetin strategjik lindor të Ukrainës Avdiyivka pas një ofensive mujore dhe po përparojnë për disa zona të tjera përgjatë vijës së frontit, thonë ukrainasit.
Ushtria e Ukrainës tha këtë javë se ishte tërhequr nga dy fshatra të tjerë pranë Avdiivka, duke humbur më shumë territor ndërsa mbështetja nga aleatët e saj perëndimorë po pakësohet.
“Armiku vazhdon operacionet aktive sulmuese në shumë zona të vijës së frontit. Situata është veçanërisht e tensionuar në rajonet Avdiivka dhe Zaporizhia”, tha ai në aplikacionin e mesazheve Telegram.
Ai gjithashtu zbuloi se njësitë sulmuese ruse po përpiqen të thyejnë mbrojtjen e Ukrainës dhe të kapin vendbanimet në rajon.
Sirsky deklaroi se disa komandantë kishin zbuluar disa mangësi në ndërgjegjësimin e situatës dhe vlerësimin e armikut” të cilat ndikuan drejtpërdrejt në qëndrueshmërinë e mbrojtjes në disa zona.
“Kam marrë të gjitha masat për korrigjimin e situatës në terren, duke siguruar municione dhe burime materiale shtesë, si dhe rezervat e nevojshme”, tha ai.
Ushtria ukrainase dhe presidenti Volodymyr Zelensky kanë thënë vazhdimisht se trupave u mungojnë pajisjet ushtarake dhe municioni i nevojshëm për të zmbrapsur sulmet ruse për shkak të mungesës së ndihmës ushtarake nga aleatët perëndimorë. /
