Tensionet midis Rusisë dhe Perëndimit janë përshkallëzuar përsëri pasi Komisioneri Evropian për Mbrojtjen dhe Hapësirën, Andrius Kubilius, paralajmëroi në një intervistë me gazetën polake Wyborcza se Kremlini po shqyrton mundësinë e një sulmi ndaj NATO-s, duke cituar informacione nga inteligjenca gjermane.
“Unë u besoj shërbimeve sekrete. Dhe inteligjenca gjermane pretendon se ka prova se Kremlini po diskuton një sulm ndaj NATO-s. A po planifikojnë një sulm? Nuk e dimë. Por duhet t’i marrim sinjale të tilla jashtëzakonisht seriozisht. Ata mund të jenë vërtet gati për luftë, dhe ne gjithashtu duhet të jemi gati, duke mësuar jo vetëm nga ukrainasit, por edhe nga vetë rusët”, tha Kubilius, raportoi britanikja Express.
Presidenti rus Vladimir Putin reagoi gjithashtu ndaj pretendimeve gjithnjë e më të shpeshta në lidhje me kërcënimin rus, i cili të enjten, duke iu përgjigjur akuzave nga Uashingtoni, e quajti NATO-n një “tigër letre”.
“Tigër letre. Pra, çfarë vjen më pas? Shkoni dhe përballuni me atë tigër letre. Nëse po luftojmë të gjithë bllokun e NATO-s, dhe po përparojmë dhe ndihemi të sigurt, dhe ju na quani një tigër letre, atëherë çfarë është vetë NATO?”, tha Putin. Presidenti rus akuzoi anëtarët e aleancës se furnizojnë Ukrainën me armë, inteligjencë dhe trajnim ushtarak, duke shtuar se NATO po “krijon histeri” në lidhje me një sulm të mundshëm rus ndaj njërit prej anëtarëve të saj.
“Nëse dikush ende dëshiron të matë forcat me ne në sferën ushtarake, mos ngurroni ta provoni. Kundërmasat ruse nuk do të vonojnë shumë“, tha Putin.
Ky shkëmbim mesazhesh vjen në një kohë incidentesh gjithnjë e më të shpeshta me dronë dhe shkelje të hapësirës ajrore të NATO-s, veçanërisht në kufijtë lindorë të Evropës, gjë që rrit më tej shqetësimet brenda Aleancës.
Komisioneri Kubilius theksoi se Evropa duhet të përshpejtojë zhvillimin e aftësive të veta mbrojtëse, veçanërisht në fushën e dronëve dhe sistemeve pa pilot, duke ndjekur shembullin e Ukrainës. “Ne duhet të jemi të gatshëm, sepse çdo tregues i agresionit rus nuk duhet të na habisë”, përfundoi ai. /tesheshi.com/