Zv.Ministrja e Shëndetësisë dhe drejtuesja e Komitetit teknik të Ekspertëve Mira Rakacolli, ka deklaruar se masat anti-Covid nuk do të ndryshojnë, me përjashtim të natës së ndërrimit të viteve.
Rakacolli tha se ora policore vijon të mbetet në intervalin 23:00 deri më 06:00 të mëngjesit.
“Niveli i masave që janë në fuqi është i përshtatshëm për të përballuar situatën. Mbeten në fuqi masat që janë. Por përhapja e Omicron në botë, bën të domosdoshëm respektimin e përgjegjshëm të masave.
Të gjithë studiuesit po bëjnë thirrje për përshpejtim të procesit të vaksinimit, sepse po bëhet e qartë se infektohen më tepër të pa vaksinuarit dhe humbjet e jetës janë te të pa vaksinuarit. Sidomos kjo bëhet e ndjeshme në kushtet e pranisë së variantit Omicron.
Vaksinimi s’është zgjedhje personale, por përgjegjësi kolektive. Jemi në fundvit, vjet patëm raste të rritura për shkak të mosrepspektimit të masave. Të respektohen standardet këtë vit e të përdoret maska. Ora policore vijon të mbetet e njëjtë, përjashtim të natës së ndërrimit të viteve”,-tha Rakacolli.
Në lidhje me “Omicron”, komiteti teknik i ekspertëve pohoi se varianti i ri ka mbërritur në Shqipëri, dyshim i cili është konfirmuar pas analizave të kryera në Gjermani. Analizat kanë konfirmuar 2 raste me ‘Omicron’ në Shqipëri.
“Siç jeni në dijeni prej disa javësh në botë po qarkullon Omicron. Komiteti bën me dije se është konfirmuar dyshimi i specialistëve për praninë e Omicron edhe në Shqipëri me përgjigjen e ardhur nga laboratori në Gjermani.
Megjithatë në Shqipëri vijon të mbizotërojë varianti Delta. Si jeni në dijeni situata epidemiologjike në Shqipëri paraqitet e qëndrueshme edhe në dy javët e fundit si në drejtim të rasteve të reja ditore edhe në drejtim të rasteve që kërkon trajtim spitalor“, tha Rakacolli.
