A e dinit se arrat kanë të paktën 2 herë më shumë antioksidant se çdo frut tjetër i thatë?
Por, fatkeqësisht njerëzit nuk i konsumojnë ato çdo ditë për të marrë përfitimet nga ky superfrut.
Sipas një studimi të kryer nga “Universiteti i Pensilvanisë” antioksidantët që gjenden me shumicë te arrat, e ndihmojnë organizmin të luftojë radikalet e lirë, të cilët dëmtojnë qelizat duke shkaktuar kështu sëmundje të ndryshme.
Arrat gjithashtu janë të pasura me acide yndyrore të pangopura, vitamina dhe proteina, por shkencëtarët thonë se njerëzit nuk i konsumojnë ato në sasinë e duhur për të marrë përfitimet nga to.
Studime të mëparshme kanë treguar se konsumimi i arrave mund të reduktojë në mënyrë efikase plakjen dhe në të njëjtën kohë ndihmon zemrën dhe lufton disa lloje kanceri. Sipas studimit konsumimi i 7 arrave në ditë është i mjaftueshëm për të parandaluar sëmundjet e zemrës.Për këtë arsye ato janë në listën e 3 ushqimeve më të mira që mbështesin shëndetin e zemrës.
Arrat gjithashtu janë të pasura me fibra dhe minerale. Ato gjithashtu kanë dhe një përqindje të lartë yndyre të shëndetshme rreth 55-65 për qind. Ndaj nuk është surprizues fakti që studimi ka treguar se konsumi i rregullt i tyre mund të reduktojë rrezikun nga diabeti i tipit 2.
Shumë njerëz e shmangin konsumimin e arrave pasi mendojnë se ato ndikojnë në shtimin e peshës për shkak të nivelit të lartë të yndyrnës që ato kanë. Por, në fakt yndyra që gjendet tek arrat është e shëndetshme dhe nuk i bllokon enët e gjakut. Madje ndryshe nga çfarë besojnë njerëzit, konsumimi i arrave mund të bëjë që ju të humbni peshë pasi ato shkaktojnë një ndjesi ngopjeje për një kohë të gjatë.
