Zëdhënësi i Kremlinit, Dmitry Peskov, tha se Rusia vazhdon të angazhohet në bisedimet me Turqinë dhe Kombet e Bashkuara (OKB) për marrëveshjen e drithërave të Detit të Zi.
Zbatimi i vazhdueshëm i marrëveshjes së drithërave pa pjesëmarrjen e Rusisë është “vështirë i mundshëm dhe i rrezikshëm”, tha Peskov në konferencën javore për media në Moskë, pasi vendi të shtunën pezulloi në mënyrë të njëanshme pjesëmarrjen në marrëveshjen.
“Në kushtet kur Rusia thotë se është e pamundur të garantohet siguria e lundrimit në këto zona, natyrisht, një marrëveshje e tillë nuk ka gjasa të zbatohet. Ajo merr një karakter tjetër, shumë më të rrezikshëm dhe jo të garantuar”, tha Peskov, i cituar nga agjencia shtetërore ruse e lajmeve TASS.
Duke fajësuar Ukrainën për rrezikimin e marrëveshjes së drithërave, Peskov tha se Rusia mbetet në kontakt me Turqinë dhe OKB-në përmes Ministrisë së Punëve të Jashtme të Rusisë dhe agjencive të tjera.
Lidhur me kushtet e Rusisë për vazhdimin e mundshëm të marrëveshjes, Peskov tha: “Nuk jam ende gati t’i përgjigjem kësaj pyetjeje, nuk është e lehtë”.
Turqia, OKB-ja dhe Ukraina ranë dakord të dielën për një plan lëvizjeje për 16 anije që ndodhen në ujërat turke.
Qendra e Përbashkët e Koordinimit me bazë në Istanbul, e cila mbikëqyr dërgesat sipas marrëveshjes, tha se të tre delegacionet ranë dakord gjithashtu të inspektonin 40 anije që dalin sot.
Qendra shtoi se pala ruse ishte e informuar për zhvillimin.
Të shtunën, Rusia njoftoi se kishte pezulluar pjesëmarrjen e saj në marrëveshjen për eksportin e drithërave ukrainase pas sulmeve ndaj flotës së saj të Detit të Zi.
Turqia, OKB, Rusia dhe Ukraina nënshkruan një marrëveshje më 22 korrik në Istanbul për të rifilluar eksportet e grurit nga tre porte ukrainase të Detit të Zi, të cilat u ndaluan pas fillimit të luftës Rusi-Ukrainë në shkurt.
Burimi: AA