Shefi i Shërbimit të Inteligjencës së Jashtme Ruse (SVR) Sergei Naryshkin tha më 5 mars se lideri i opozitës Alexei Navalny kishte vdekur për shkaqe natyrore, një deklaratë që dukej të ishte një përpjekje për të shmangur zemërimin ndërkombëtar për vdekjen e armikut të vendosur të Presidentit Vladimir Putin.
Naryshkin e tha këtë në një intervistë të transmetuar nga televizioni shtetëror rus. Ai nuk dha shkakun e vdekjes.
“Herët a vonë, jeta përfundon dhe njerëzit vdesin. Navalni vdiq nga shkaqe natyrale”, tha ai.
Shumë udhëheqës perëndimorë thanë se Putin ishte përfundimisht përgjegjës për vdekjen e Navalny-t më 16 shkurt në një burg të largët të Arktikut. Kremlini i hedh poshtë akuzat.
Dyzet e shtatë vjeçari Navalny, i cili vdiq në rrethana misterioze, u varros më 1 mars në një varrezë në Moskë. Të paktën 120 persona u arrestuan në Rusi për pjesëmarrje në mitingje për nder të kujtimit të tij.
Më shumë se 40 vende kanë bërë thirrje për një hetim ndërkombëtar të pavarur për vdekjen e liderit të opozitës ruse Alexei Navalny, duke thënë se presidenti rus Vladimir Putin mban përgjegjësinë përfundimtare.
Anëtarët e Bashkimit Evropian, Shtetet e Bashkuara, Britania, Ukraina, Australia, Kanadaja, Zelanda e Re dhe Norvegjia janë ndër vendet në Këshillin e të Drejtave të Njeriut të Kombeve të Bashkuara që kanë shprehur zemërim për vdekjen e Navalny.
Vendet thanë se ishin thellësisht të shqetësuara për “goditjen sistematike të shoqërisë civile” dhe shtypjen e opozitës politike në Rusi dhe jashtë saj. Ata i bënë thirrje Rusisë që menjëherë dhe pa kushte të lirojë të gjithë të burgosurit politikë, mbrojtësit e të drejtave të njeriut, gazetarët dhe aktivistët kundër luftës të ndaluar për ushtrimin paqësor të të drejtave të tyre të njeriut dhe kundërshtimin e luftës së Rusisë në Ukrainë. /
