Besimtarët Mysliman festojnë sot Fiter Bajramit.
Gjatë fjalës së tij në ceremoninë e faljes së Fiter Bajramit në Sheshi Skënderbej, Kryetari i Komunitetit Mysliman të Shqipërisë, Bujar Spahiu, u shpreh ndër të tjera se sot besimtarët i luten Zotit të pranojë agjërimin, sadakanë e fitrit dhe zekatin.
“Muaji Ramazan është muaji ku për secilin nga ne u krijuan rrethanat për shpëtim dhe udhëzim në rrugën e vërtetë. Lutemi të kemi dalë nga muaji i Ramazanit me një pastërti dhe ndriçim shpirtëror. Ashtu siç thotë i dërguari i Zotit: Nëse kemi agjëruar me besim dhe bindje te Zoti i gjithëpushtetshëm, Ai na i ka fal mëkatet”, u shpreh ai.
Spahiu ka sqaruar se Xhamia e “Namazgjasë” nuk është ende gati për të pritur besimtarët për shkak se nuk kanë përfunduar punimet. Megjithatë ai theksoi se falja e namazit bëhet në shesh prej numrit të lartë të besimtarëve, për të cilët nuk do të kishte kapacitet asnjë xhami.
” As Xhamia e Namazgjasë nuk i merr të gjithë besimtarët, ndaj falja bëhet në sheshe. E rëndësishme është që Bajrami është gëzim e hare dhe i bëj thirrje njerëzve që të jemi pranë atyre në nevojë, pranë familjes sonë që të jemi një shoqëri sa më solide”, tha ai.
