Ndalimi i parashikuar i hixhabit, në rast se zgjidhet kandidatja presidenciale franceze Marine Le Pen, do të ndodhte “pak nga pak” dhe do të përcaktohej nga ligjvënësit, thanë aleatët e saj të hënën, duke shënuar një ndryshim në retorikën e tyre më pak se një javë përpara votimit përfundimtar për Presidentin e Francës.
Bërthama e ekstremit të djathtë e programit të Le Pen-it është vënë nën kritika të forta ndërkohë që fushata po hyn në ditët e saj të fundit.
Louis Aliot, kryebashkiaku i ekstremit të djathtë të Perpignan-it dhe ish-shoku i jetës së Le Pen-it, tha në një intervistë për radion France Inter se ndalimi i hixhabit ishte një nga mjetet politike për të luftuar “islamizmin”, por se zbatimi i tij duhej të vinte “në mënyrë progresive”.
Ndalimi duhet të synojë fillimisht shërbimet shtetërore, tha ai, përpara se të zgjerohet “pak nga pak”. “Do të ketë një debat në parlament dhe më pas do të bëhet zgjedhja”, shtoi ai.
Një tjetër aleat i Le Pen, David Rachline, kryebashkiaku i qytetit mesdhetar të Frejus, gjithashtu të hënën u duk se e zbuti qëndrimin e tij. “Ne nuk duam të sulmojmë njerëzit… jo të gjitha gratë që mbajnë hixhab janë islamiste,” tha ai.
Le Pen-i ka thënë më parë se hixhabi nuk mund të shihej si shenjë e besimit fetar të një personi, por ishte një “uniformë islamike” që duhej të ndalohej nga hapësira publike franceze.
Avokatët në Francë kanë thënë se ndalimi i hixhabit do të shkelte kushtetutën franceze.
Ngecja
Sondazhet kryesore ende e tregojnë Macron-in si fituesin e mundshëm, megjithëse me një diferencë të vogël.
Një sondazh i Ipsos për radion France Info dhe gazetën Le Parisien, i botuar të hënën, tregoi se Macron arriti 56%, një rritje prej 0.5% nga një ditë më parë dhe 3% nga raundi i parë. Një sondazh i Ifop tregoi një prirje të ngjashme, megjithëse me vlerësimin e tij të pandryshuar nga një ditë më parë në 53.5%.
Të dy kandidatët përballen me sfidën e arritjes së votuesve me prirje të majtë pas eliminimit të kandidatëve të tjerë, duke mbajtur në këmbë markat e tyre politike, një detyrë veçanërisht e vështirë për Le Pen-in kur bëhet fjalë për Islamin dhe emigracionin.
