Ministri i Jashtëm i Turqisë, Mevlüt Çavuşoğlu, përuroi Kolegjin San Roman të Fondacionit Maarif të Turqisë të enjten në kryeqytetin e Venezuelës Karakas.
Duke folur gjatë ceremonisë, Çavuşoğlu tha se Venezuela është ndalesa e fundit e turneut të tij në Amerikën Latine dhe se është i lumtur që është atje.
“Ne besojmë se shkollat që hapim do të japin kontribut të rëndësishëm për të ardhmen e Venezuelës”, tha Çavuşoğlu dhe u uroi fat të gjithë mësuesve dhe studentëve atje.
“Jemi krenarë për Fondacionin tonë Maarif sepse ai mban flamurin, gjuhën dhe kulturën tonë kudo”, shtoi ai.
“Besojmë se numri i shkollave dhe nxënësve do të rritet me shpejtësi në periudhën e ardhshme. Ne kemi besim të plotë në miqtë tanë venezuelas në këtë drejtim”, tha Çavuşoğlu, duke vënë në dukje se Fondacioni Maarif është bërë një nga pesë institucionet më të mira në botë në një kohë të shkurtër.
Ministri i Jashtëm i Venezuelës, Felix Plasencia, shprehu kënaqësi për pritjen e homologut nga Turqia.
“Miku im i dashur Çavuşoğlu udhëtoi në të gjithë Amerikën Latine derisa erdhi këtu dhe unë me të vërtetë e falënderoj shumë”, tha ai.
Plasencia falënderoi gjithashtu Fondacionin Maarif për kontributin e tij në arsim.
Vizita e kryediplomatit Çavuşoğlu në Venezuelë në turneun në Amerikën Latine vjen pas ndalesave të tij në Panama, Kolumbi, Uruguaj, Brazil dhe Ekuador.
Çavuşoğlu sot do të takohet me presidentin venezuelas, Nicolas Maduro në kuadër të vizitës së tij.
Burimi: AA
