Kryeministri i Norvegjisë, Jonas Gahr Store tha se bisedimet e zhvilluara nën organizimin e vendit të tij me anëtarët e talebanëve janë të nevojshme.
Sipas lajmit të “Zërit të Amerikës” Store ka dhënë deklarata për gazetarët në New York duke potencuar se pavarësisht protestave nga grupet e të drejtave të njeriut, bisedimet që u mbajtën me anëtarët e talebanëve në Oslo gjatë 23-25 janar janë të nevojshme.
Ai tha se pritja e administratës talebane në vend ishte një veprim i vështirë për qeverinë. Store shpjegoi se mbledhjet nuk nënkuptojnë “legjitimimin” e qeverisë talebane.
Store i ka cilësuar bisedimet si një “hap i parë” i hedhur për të parandaluar krizën humanitare në Afganistan dhe një “kuadër” ku talebanëve u janë përcjellë pritshmëritë dhe mesazhet ndërkombëtare. Po ashtu kryeministri norvegjez bisedimet i ka cilësuar si “të sinqerta” dhe “serioze”.
Pasi foli për situatën humanitare në Afganistan, Store tha se 1 milion fëmijë ndodhen përballë rrezikut të urisë dhe se gjysma e popullsisë ka nevojë për ndihmë.
Në bisedimet që u zhvilluan me dyer të mbyllura, krahas ndihmave humanitare që do të dërgohen në vend është diskutuar edhe për shkollimin e femrave afgane dhe gjithëpërfshirjen e qeverisë talebane.
Tomas Niklasson, përfaqësuesi special i Bashkimit Evropian që u takua në Oslo me delegacionin taleban, në një postim nga Twitteri njoftoi se në takim kanë vënë theksin mbi “vitin e ri arsimor në Afganistan që filloi në mars dhe nevojën që shkollat fillore dhe të mesme të jenë të aksesueshme për djemtë dhe vajzat”.
Në një deklaratë nga Ministria e Jashtme norvegjeze ishte njoftuar se përfaqësuesit talebanë u ftuan në Oslo më 23-25 janar.
Delegacioni taleban u njoftua se në Norvegji krahas qeverisë norvegjeze dhe përfaqësuesve të disa vendeve aleate do të zhvillonte takime edhe me përfaqësues të organizatave të shoqërisë civile.