Kryeministri i Spanjës, Pedro Sanchez bëri thirrje për t’i dhënë fund urgjentisht “katastrofës humanitare” në Rripin e Gazës gjatë takimit të tij me presidentin izraelit Isaac Herzog të enjten.
“Të gjithë civilët duhet të mbrohen me çdo kusht dhe ndihma humanitare duhet të hyjë menjëherë në Rripin e Gazës”, i tha Sanchez presidentit izraelit.
Në ndalesën e parë të turneut të tij në Izrael, Palestinë dhe Egjipt, Sanchez i tha Herzogut se beson se Izraeli ka të drejtë të mbrohet, por se kjo duhet të jetë në përputhje me ligjin ndërkombëtar humanitar.
“Përgjigjja nuk mund të nënkuptojë vdekjen e civilëve të pafajshëm në Gaza, përfshirë mijëra fëmijë”, u filmua Sanchez duke i thënë Herzogut në një bisedë publike.
Kryeministri i sapozgjedhur spanjoll shtoi se sapo të marrë fund konflikti, kontrollin e Gazës duhet të marrin autoritetet palestineze duke kundërshtuar pushtimin nga Izraeli.
Sanchez gjithashtu bëri thirrje që bisedimet e paqes të zhvillohen “sa më shpejt të jetë e mundur”.
“Duhet të arrijmë krijimin e një shteti të qëndrueshëm palestinez. Izraelitët dhe palestinezët kanë të drejtë të jetojnë në paqe dhe siguri. Për këtë, ata mund të mbështeten te Spanja”, tha Sanchez.
Pas takimit me Herzogun, kryeministri spanjoll do të takohet me kryeministrin izraelit Benjamin Netanyahu. Pas kësaj, ai do të vizitojë Kibbutz Be’eri, ku rreth 100 persona u vranë gjatë sulmit të Hamasit më 7 tetor.
Më pas, Sanchez do të takohet me presidentin palestinez Mahmud Abbas në Ramallah.
Ai po udhëton së bashku me homologun e tij belg Alexander De Croo, i cili gjithashtu shprehu “shqetësimin e tij të thellë për viktimat e shumta civile në Gaza” gjatë takimit të tij me Herzogun.
“Rritja e shpejtë e qasjes humanitare dhe respektimit të ligjit ndërkombëtar nga të gjitha palët është me të vërtetë thelbësore”, tha De Croo.
Spanja aktualisht mban presidencën e radhës të Këshillit të BE-së. Në janar, këtë rol do të marrë Belgjika.
Sanchez është zotuar të njohë shtetin e Palestinës ndërsa qeveria belge ka njoftuar se po shqyrton një veprim të ngjashëm.
Të premten, liderët spanjollë dhe belgë do të udhëtojnë në Egjipt.
Burimi: AA
