Shtëpia e Bardhë do të dërgojë për ritrajnim një nga qentë ujqër gjermanë të çiftit presidencial, sepse ka rezultuar se kafshon dhe rrezikon stafin.
Presidenti Joe Biden dhe Zonja e Parë Jill u vendosën në Shtëpinë e Bardhë me dy ujqërit e tyre, Chub dhe Major. Pas vdekjes së Chub, Majori i ri energjik ua vodhi zemrat.
Madje u publikua një video në të cilën presidenti amerikan luante me të ose e drejtonte me zinxhir brenda rezidencës presidenciale, duke i thënë: “Hajde, shok”.
Por “shoku” i Bidenit po kafshon, raporton shtypi amerikan, madje duke cituar dokumente të Shërbimit Sekret.
Sipas tyre, Major është përfshirë në – as më shumë e as më pak – dhjetë incidente dhe në njërën prej tyre viktima e tij është dashur të shkojë në spital. Në një rast, Jill Biden nuk ishte në gjendje të kontrollonte qenin, i cili vazhdimisht kërcënonte një agjent të Shërbimit Sekret.
“Është vetëm çështje kohe para se ai të sulmojë ose kafshojë një agjent apo punonjës”, tha një anëtar i Shërbimit Sekret në një email të përfshirë në dokumente.
Drejtori i komunikimit të zonjës së parë i tha CNN se Shtëpia e Bardhë është një “vend unik” që “shpesh shkakton stres për kafshët shtëpiake”. Për këtë arsye, Majori do të duhet të ritrajnohet, siç u bë me qenin tjetër presidencial.
Majori u birësua nga një strehë qensh dhe është kafsha e parë e shpëtuar e një presidenti. Por Bidenët u detyruan ta kthenin shkurtimisht në Delaëare për klasa intensive të “sjelljes së mirë” pasi ai kafshoi të paktën një punonjës të Shtëpisë së Bardhë.
