Marrëveshja për lirinë e lëvizjes me karta identiteti në Ballkanin Perëndimor do të hyjë në fuqi pas kalimit të procedurës së ratifikimit në parlamentet shtetërore të të gjashtë vendeve të rajonit, e cila duhet të ndodhë në vitin 2023, tha Sekretarja e Përgjithshme e Këshillit të Bashkëpunimit Rajonal(RCC), Majlinda Bregu.
Më 21 tetor, ministrat e Punëve të Jashtme të Maqedonisë së Veriut, Shqipërisë, Bosnjës, Kosovës, Malit të Zi dhe Serbisë ranë dakord për tre marrëveshje mobiliteti të koordinuara nga Këshilli i Bashkëpunimit Rajonal (RCC) në kuadër të procesit të Berlinit, ndër të cilat kryesore marrëveshje për lëvizjen me kartë identiteti.
Tre marrëveshjet – për lirinë e lëvizjes me kartë identiteti, për njohjen e kualifikimeve të arsimit të lartë dhe për njohjen e kualifikimeve profesionale për mjekët dhe arkitektët – pritet të nënshkruhen në një samit më 3 nëntor në kryeqytetin gjerman.
Liberalizimi i vizave ndërmjet Bosnjes dhe Kosovës
Harmonizimit të versionit të dokumentit i kanë paraprirë gati dy vjet negociata intensive dhe siç është paralajmëruar, kjo marrëveshje shemb edhe “murin e vizave” të fundit në rajon.
“Një mur është ndarja, që është e kundërta e bashkëpunimit. Rrëzimi i murit të fundit të regjimit të vizave në Ballkanin Perëndimor do të thotë shumë për qytetarët. Sepse heqja e vizave sjell me vete avantazhe, më së shumti në dy nivele. Në radhë të parë, do të thotë bashkëpunim më i mirë ekonomik dhe politik dhe përmirëson kontaktet mes njerëzve”, tha znj. Bregu.
Një nga marrëveshjet që do të nënshkruhen përfshin një për lëvizjen e lirë me karta identiteti dhe heqjen e regjimit ekzistues të vizave ndërmjet Bosnjës dhe Kosovës.
Përveç Serbisë, Bosnja është i vetmi vend në rajon që nuk e njeh pavarësinë e Kosovës dhe i vetmi vend në rajon që ka regjim të vizave me Kosovën. Në vitin 2014, Kosova vendosi masa reciproke të regjimit të vizave për Bosnjën, pasi ky vend nuk i hoqi vizat për qytetarët e Kosovës. Këto masa krijuan probleme të mëdha për qytetarët e dy vendeve dhe pamundësuan lëvizjen e lirë.
Bosnja ka lëshuar 107 viza për qytetarët e Kosovës vitin e kaluar, ndërsa numri i kërkesave të refuzuara ka qenë dy herë më i madh (283), tha Bregu.
“Fatkeqësisht, për shkak të këtij muri të madh dhe regjimit të vizave në rajon, numri i aplikimeve nga qytetarët kosovarë që dëshironin të vizitonin Bosnjën, apo të takonin miqtë e tyre atje, ka rënë në mënyrë drastike për shkak të vizave. Në vitin 2018, pothuajse 1500 qytetarët kosovarë kanë aplikuar për vizë për në Bosnje, ndërsa vitin e kaluar ky numër ka rënë në rreth 400”, tha Bregu.
Sipas Bregut, ky është një shembull i mjaftueshëm për të shpjeguar pse heqja e barrierave të vizave në rajon është shumë e rëndësishme për të përmirësuar lidhjen në rajon, për të thelluar integrimin ekonomik dhe për të rritur kontaktet mes njerëzve.
