Ish-kryeministri Sali Berisha u paraqit sot (23 janar) në SPAK ku u mor në pyetje në lidhje me hetimet për dosjen Partizani. Në fjalën e mbajtur nga banesa e tij, ku po vuan arrestin e shtëpisë, Berisha tha se ishte në Prokurorinë e Posaçme për të denoncuar me forcën më të madhe, vendimet antiligjore që janë marrë ndaj tij.
Berisha është shprehur se ka shkuar në SPAK (të cilën e quan SKAP-i i partisë) sepse sipas tij, kryeministri Rama nuk i lejonte prokurorët që ta pyesnin pasi pretendon se ata kishin frikë nga përgjigjet e tij.
“Sot u shkova për tu marrë në pyetje për herë të parë pas 3 vitesh hetim false. Për kureshtjen tuaj kur më pyeten ky banon, ju përgjigja ‘rruga e shpresës’, u dridhen nga frika, u tmerruan.
Unë shkova dhe shkova në përputhje me një parim që unë e besoj plotësisht, për të cilin dhe kam luftuar. Në vitin 2012 kemi hequr në parlament mbrojtjen për marrjen në pyetje të deputetëve.
Në këtë kontekst, isha i bindur se Edi Rama që nuk kishte lejuar grupin e tij të organizuar në kriminal në Skapin e partisë që të më pyesnin, kishte frikë dhe tmerr nga përgjigjet e mia.
Ndaj dhe unë ju deklarova përfaqësuesve të organizatës kriminale të Edi Ramës se jam këtu për ti bërë gjyqin, për të denoncuar aktin antikushtetues të Edi Ramës, keqshfrytëzimin e segmenteve të tij të krimit në Skapin e partisë, për vendosjen e masave të sigurisë pa marrë miratimin e parlamentit, në një akt të mirëfilltë puçist ndaj parlamentit.
Edi Rama i tmerruar nga Sali Berisha vendosi duke besuar se do të intimidonte në mënyrën më antikushtetuese masa ndalimi i daljes jashtë vendit, paraqitja e rregullt në polici, të cilat unë në emrin tuaj dhe të çdo shqiptari që i thotë kushtetutës, kushtetutë dhe ligjit, ligj, i refuzova me përçmimin më të madh.
Isha aty për të denoncuar gjithashtu aktin prej burracaku, aktin prej frikacaku, aktin e turpshëm kriminal të kreut të narkoshtetit Edi Rama, që urdhëroi grupin e strukturuar kriminal të tij në Skap të kryesuar nga Damani, Kraja, Millonaj, por dhe plotë të tjerë aty, ti kërkojë parlamentit rëndimin e masave, jo mbi bazë faktesh, provash, dokumentesh, se ato nuk ekzistonin, por ti kërkojë mbi bazën se unë refuzova aktin e tyre puçist dhe parlamenti i Lindës së parlamentit, në një akt të pashembullt, pa dosje, pa prova, pa fakte, pa dokumente në prani të 50 gardistëve aktin e arrestimit tim, me burg apo në shtëpi, heqjen e imunitetit e me radhë”, tha Berisha.
